Sý tasqyny: Atyraýda 500 úıge elektr qýaty qaıta berildi

ASTANA. KAZINFORM – Atyraý oblysy ákiminiń baspasóz hatshysy Rýslan Jumaǵalıev óńirdegi sý tasqyny jaǵdaıy týraly baıandady.

«Jylyoı aýdanyndaǵy jaǵdaıǵa qatysty oń dınamıka baıqalady – sońǵy birneshe kúnde Jem ózenindegi sý deńgeıi 85 sm tómendedi, Dossor-Qulsary tas jolyn qalpyna keltirý jalǵasýda. Sondaı-aq, qalanyń ózinde sý aıdaý jumystary belsendi júrgizilýde. Bul maqsatqa 58 tehnıka jumyldyryldy, ótken táýlikte 11 myń tekshe metr sý soryldy», - dedi Rýslan Jumaǵazıev Respýblıkalyq aqparattyq shtabta ótken brıfıngte.

Sondaı-aq, spıkerdiń aıtýynsha, elektr qýatyn qalpyna keltirý jumystary júrýde. Qazir 500 úıge elektr qýaty qaıta berildi, kún saıyn 60-tan 100-ge deıin úı qosylyp otyrady.

«Jylyoı aýdany boıynsha epıdemıologııalyq jaǵdaı turaqty, kún saıyn sý synamalary alynady. Avtojanarmaı quıý stantsııalarynyń, azyq-túlik dúkenderiniń, dárihanalardyń, qoǵamdyq tamaqtaný oryndarynyń qyzmeti qaıta jandandy», - dedi ol.