Sý tasqyny: Atyraý oblysynda sotqa 133 talap aryz túsken

ATYRAÝ. KAZINFORM – Atyraý oblysynyń sottaryna 16 qyrkúıekke deıin sý tasqynynan zardap shekkenderden 133 talap aryz túsken. Onyń ishinde 15 shaǵymdanýshynyń talaby qanaǵattandyrylyp otyr.

Atyraý oblystyq soty ákimshilik ister jónindegi sot alqasynyń tóraǵasy Anargúl Salıhovanyń Kazinform-ǵa usynǵan málimetine súıensek, talap aryzdyń 129-y Jylyoı aýdanynan, al, 4-eýi Qyzylqoǵa aýdanynan berilgen.

«16 qyrkúıekke deıin sý tasqynynan zardap shekken turǵyndardan azamattyq ister boıynsha 56, ákimshilik iske qatysty 77 talap qoıý tústi. Shaǵymdanýshylar «Jylyoı aýdany ákimi apparaty» memlekettik mekemesi men turǵyndardyń arasynda jasalǵan kelisim shartty buzý, ákimdiktiń áreketin zańsyz dep taný, zardap shekkenderge keltirilgen zııandy baǵalaý jáne óteý jónindegi komıssııanyń áreketin zańsyz dep taný, qaıta baǵalaýdy mindetteý, úıdi apatty dep taný, keltirilgen zııandy óteý, materıaldyq shyǵyndy óndirý týraly talap qoıdy», - dedi Anargúl Salıhova.

Onyń deregine qaraǵanda, azamattyq ister boıynsha talaptardyń 55-i Jylyoı aýdandyq sotyna, 1-eýi Atyraý qalalyq sotyna túsken. Al, ákimshilik isterge qatysty talaptardyń 75-i Atyraý oblystyq mamandandyrylǵan aýdanaralyq ákimshilik sotyna, 2-eýi Qyzylqoǵa aýdandyq sotyna berilgen.

«Azamattyq ister boıynsha talap qoıýshylardyń talaptary sotpen qaralý satysynda tur. Atyraý oblystyq mamandandyrylǵan aýdanaralyq ákimshilik sotymen 16 ákimshilik iske qatysty sheshim qabyldandy. Onyń ishinde 15 talap qoıýshylardyń talaby qanaǵattandyryldy. Al, 1 talapty qanaǵattandyrýdan bas tartyldy. Atalǵan sotta 6 talap taraptardyń medıatsııalyq kelisimge kelýine baılanysty keri qaıtaryldy», - dep málim etti Anargúl Salıhova.

Sot sheshimderi zańdy kúshine engen joq.

Eske sala ketelik, budan buryn Tasqyn sý basqan Qulsarynyń turǵyndaryna 62 úı berilgenin habarlaǵan edik.