Sý tasqyny; Atyraý qalasynda 94 evakýatsııa pýnkti daıyn tur

ATYRAÝ. KAZINFORM – Atyraý qalasynda tasqyn sýdyń qaýpi tóngen jaǵdaıda turǵyndardy ornalastyratyn 94 evakýatsııa pýnkti daıyn tur.

Atyraý oblysy jedel shtabynyń aqparatyna qaraǵanda, evakýatsııa pýnktterinde 10 250 oryn bar.

«Evakýatsııa pýnktteri tasqyn qaýpi tóngen jaǵdaıda qala turǵyndaryn qaýipsiz aýmaqtarǵa kóshirýge daıyndaldy. Qazir evakýatsııa pýnktteriniń bárine kereýetter jetkizilip, tósek-oryn jabdyǵy qoıyldy. Sý tasqynyna baılanysty tótenshe jaǵdaı týyndasa, qala aýmaǵynda belgilengen evakýatsııa pýnktteri turǵyndardy kedergisiz qabyldaı alady», -dep habarlady oblystyq jedel shtab.

Búgin, 20 mamyrda Jaıyq ózenindegi sý Atyraý qalasynyń tusynda +3 santımetrge ulǵaıǵan. Munaıly shaharda qaýipti shek – 550 santımetr. Qazir sý deńgeıi qaýipti shekten 23 santımetrge asyp tur.

Jaıyq sýy Atyraý qalasynyń mańyndaǵy Jańatalap aýylynda 416, al, Erkinqala eldi mekeninde 374 santımetr boldy.

Eske sala ketelik, budan buryn Atyraýdaǵy Mahambet aýylyna qaýip tóngenin jazdyq.