Sý tasqyny: Atbasar qalasyna Sandyqtaý aýdany jaqtan qaýip bar

ASTANA. KAZINFORM – Atbasar qalasyna Sandyqtaý aýdany jaqtan mol sýdyń kelý qaýpi bar. Bul týraly Atbasar aýdanynyń ákimi Amanbek Qaljanov aıtty.

«Atbasar aýdanynda sý tasqyny óte kúrdeli rejımde ótip jatyr. Jabaı ózeni boıynda jekelegen sý basý derekteri bar. 172 turǵyn úı, 45 aýla jáne №1 mektep aýlasy sýdyń astynda qaldy. Erigen sýdyń mol kelýi men toqyraqtyń toń bolýy ózen deńgeıiniń kóterilip, qorǵanys bógetten asyp-tógilýine alyp keldi. Sý tasqyny táýekelderin tómendetý úshin qosymsha qorǵanys bógetterin salý, burynnan baryn nyǵaıtý, sonymen qatar erigen qar sýyn sorý jumystary júrgizildi. Qabyldanǵan sharalar ózen deńgeıin 5 metrge deıin tómendetýge múmkindik berdi. Biraq, qaýip áli saqtalyp otyr. Sandyqtaý aýdany jaqtan sý keledi dep kútip otyrmyz», - dedi ol Ortalyq kommýnıkatsııalar qyzmetindegi brıfıngte.

Onyń aıtýynsha, qaýipti aımaqtardan turǵyndar kóshirildi. Olarǵa barlyq jaǵdaı jasalyp, úsh mezgil ystyq tamaqpen qamtylǵan. 800-den astam mal qaýipsiz jerge shyǵarylǵan.

«Apatpen kúreske Aqmola, Jambyl oblystary men Shymkent qalasy garnızonynyń qutqarýshylary kómektesip jatyr. Azamattyq qorǵanys akademııasynyń ofıtserleri men kýrsanttary da óz úlesterin qosýda. Atbasar qalasynyń jergilik uıymdary men kásiporyndary da kómektesýde. Sý tasqynyna qarsy sharalarǵa 136 adam, 45 tehnıka jáne 30 motopompa jumyldyrylǵan. Árbir ýchaskege jaýapty tulǵa bekitilgen. Olar táýlik boıy júktelgen mindetterdi oryndaıdy. Qazirgi ýaqytta turǵyn úılerdi zerdeleý jáne materıaldyq shyǵyndy baǵalaý jónindegi komıssııa quryldy. Zardap shekkenderden ótinim qabyldanyp jatyr», - dedi Amanbek Qaljanov.