Sý tasqyny: Astanadan SQO-ǵa qosymsha 300 áskerı qyzmetshi jiberildi
ASTANA. KAZINFORM – Sý tasqyny saldarymen kúresý jáne aldyn alý jumystaryna qosymsha kúsh retinde Astanadan Soltústik Qazaqstan oblysyna áskerı qyzmetshiler jiberildi.
«Soltústik Qazaqstan oblysyna aýmaqtyq qorǵanys brıgadasynyń 30 áskerı qyzmetshisi Petropavl qalasynyń shetinde saıajaılar alabynda 1 myń qap qum daıyndap, Esil ózeniniń bógetin kúsheıtý jumystaryn júrgizdi. 8 sáýirde oblys ákiminiń ótinishi men Qorǵanys mınıstriniń nusqaýy boıynsha Qarýly kúshterden Astana qalasynan qosymsha 300 áskerı qyzmetshi bólindi», - dedi Qorǵanys mınıstrliginiń resmı ókili Rýslan Jangýlın Ortalyq kommýnıkatsııalar qyzmeti alańynda ótken baspasóz máslıhatynda.
Buǵan deıin Petropavlda sý basý qaýpi bar «Qyzyljar sý» kásiporny bógetterdi nyǵaıtyp jatqany týraly habarlaǵan edik.
Aıta ketsek, SQO-da ótken táýlikte 5 eldi mekennen 178 adam qaýipsiz jerge shyǵaryldy.
