Sý tasqyny: Aqtóbeniń Saryoba jerinde salynyp jatqan úıdiń kirpishi qaıta aýystyryldy
AQTÓBE. KAZINFORM – Aqtóbe oblysy Yrǵyz aýdany Saryoba jerinde salynyp jatqan úılerdiń birinde qurylysqa synǵan, ketik kirpishtiń qoldanylǵany belgili boldy. Tekserýden soń kirpishter qaıta aýystyryldy.
Yrǵyz aýdanynyń turǵyny tasqynnan keıin salynyp jatqan úılerdi vıdeoǵa túsirip, ony 19-shilde kúni taratty. Beınematerıaldan ekoton kirpishiniń mújilgenin, soǵan qaramastan úı qabyrǵasy qalanyp, turǵyzylǵanyn aıtyp, óz narazylyǵyn bildirdi. Osy vıdeodan soń Yrǵyz aýdanynyń ákimdigi aýystyrylǵan kirpishterdiń fotosyn jáne vıdeosyn taratty. Vıdeoda úıdiń ishi-syrty kórsetilip, kemshilikter joıylǵanyn habarlady.
Aıta keteıik, Aqtóbe oblysy Yrǵyz aýdanyndaǵy aýyldarda salynyp jatqan úılerdiń sany qaıta ózgerdi. Buǵan deıin Mamyr aýylyn taratý týraly usynys aıtylyp, turǵyndar jazbasha kelisim de bergen bolatyn. Biraq keıin oıynan aınyp, aýylda qalatynyn málimdegen turǵandar úshin Mamyrda 6 úı salyna bastady. Yrǵyz aýdany ákiminiń orynbasary Asqar Ýálıdiń aıtýynsha, qazirgi kezde úılerdiń irgetasy qalǵan.
— Mamyr aýylyna 6 úı salynyp jatyr. Sonymen birge keıbiri daıyn úı satyp aldy. Qazirgi esep boıynsha Yrǵyz aýdany ortalyǵynda 51, Nurada 63 jáne Mamyrda 6 úı salynyp jatyr. Barlyǵy 120 úı qurylysy bastaldy, — dedi Yrǵyz aýdany ákiminiń orynbasary Asqar Ýálı.
