Sý tasqyny: Aqtóbeniń Nura aýylyndaǵy mektepti kásipker óz qarjysyna salyp jatyr
AQTÓBE. KAZINFORM – Yrǵyz aýdany Nura aýylyndaǵy 60 oryndyq mektep kásipkerdiń óz qarjysyna salynyp jatyr. Keıin baǵalaý komıssııasy qorytyndy shyǵaryp, Yrǵyz aýdandyq ákimdigi bilim ordasyn satyp alady.
Aqtóbe oblysy ákimi baspasóz qyzmetiniń habarlaýynsha, Yrǵyz aýdanynyń ákimi men «Qýanyshbek» JShS yqtymaqtastyq týraly memorandýmǵa qol qoıdy. Keıin Nura aýylynda 60 oryndyq qurylys jumysy bastaldy. Kazinform tilshisi «Qýanyshbek» JShS-niń atqarýshy dırektory Raýan Madınovke habarlasyp, kelisim jaıyn surap bildi.
«Aqtóbe oblysynyń ákimi Yrǵyz aýdanyna kelgende jınalys ótti. Sol kezde mektep qurylysy, ony ýaqytyly tapsyrý qıynǵa soǵatyny týraly aıtyldy. Biz «eger biz óz qarjymyzǵa salsaq, keıin satyp alsa» degen usynysymyzdy aıttyq. Bul ýaqyt uttyrmaı, tez jumysqa kirisý amaly. ıAǵnı, qurylys aıaqtalady, sol kezde baǵalaý júredi. Keıin sol aqshaǵa satyp alady. Jobalaý-smetalyq qujatty ózimiz daıyndadyq. Kelisim boıynsha qurylys quny 505,6 mln teńgeden aspaýy tıis», - dedi Qýanyshbek» JShS atqarýshy dırektory Raýan Madınov.
Onyń aıtýynsha, qurylys materıaldarynyń basym bóligi Aqtóbe oblysy aýmaǵynan tasymaldanyp jatyr. Іrgetasyndaǵy beton, qabyrǵasyna qajetti kirpish te Aqtóbeden tasymaldandy.
«Armatýra, shatyr jabyndysy Aqtóbe qalasynan, jylý saqtaıtyn materıal Muǵaljardan alyndy. Qurylysty jyl aıaǵynda aıaqtaǵymyz kelip otyr. Tek jol qıyndyǵy bar. Qurylys materıaldaryn jetkizý kezinde kólikter jarty jolda batyp, ábigerge salyp tur», - dedi Raýan Madınov.
Aıta keteıik, Nura aýyly túgel kóshirilip, Saryoba jerine 63 úı salynyp jatyr. Qurylysqa barlyǵy 11 kompanııa jumyldyryldy. Munda gaz, sý, elektr jelisi tartyldy.
