Sý tasqyny: Aqtóbeniń Muǵaljar aýdanynda kóbi daıyn baspana satyp alýdy jón kórdi

AQTÓBE. KAZINFORM — Aqtóbe oblysy Muǵaljar aýdanynda barlyǵy 76 úı búlindi. Qazirgi kezde 14 úıdiń qurylysy júrip jatyr. Al 54 úıdiń ıesi daıyn úı satyp alýǵa sheshim qabyldady.

Muǵaljar aýdanynyń birneshe aýyly men Embi qalasynda sý tasqynyna qarsy jumys júrgizildi.

Munda 76 úıge sý kirip, tehnıkalyq tekserýshiler men baǵalaý komıssııasynyń sheshimimen 68 úı turýǵa jaramsyz dep tanyldy. 

Al 8 úıdi jóndeý jumystaryna 17 mln 450 myń teńge berildi. Muǵaljarlyqtardyń kóbi aýdan ortalyǵy Qandyaǵash qalasyna kóshýdi jón sanap otyr. 

— Muǵaljar aýdanynyń Jaǵabulaq aýylynda 9, Birlik aýylynda 5 úı salynyp jatyr. Barlyǵy 54 turǵyn daıyn úı satyp alýǵa ótinish berdi. Onyń 21-ine úı satyp alý qarjysy aýdaryldy. Taǵy 22 úıdiń qujaty daıyn. Ózge otbasylar satyp alatyn úı izdep júr. Kóbi aýdan ortalyǵy Qandyaǵash qalasyna kóshýdi jón kórdi. Satyp alǵan 21 úı de Qandyaǵashtan, — dedi Muǵaljar aýdany ákiminiń orynbasary Talǵat Ótemuratov. 

Jaǵabulaq aýylyndaǵy qurylys jumysy mamyr aıynda bastaldy. Merdiger kompanııa shildede bar jumysty aıaqtaýdy josparlap otyr. 

— Bizdiń kompanııa Jaǵabulaq jáne Birlik aýyldaryna úı salyp jatyr. Munda qurylys jumysyna qajetti materıaldar jetkizildi. Jaǵabulaqta 30-dan astam jumysshy bar. Qurylysqa tartylǵan adamdardyń bári óz kompanııamyzdyń jumysshylary, — dedi merdiger mekeme basshysy Anur Ahmadı. 

Aıta keteıik, sý tasqyny kezinde malynan aıyrylǵan 8 sharýa qojalyǵy men 5 adam shyǵyndy óteý jóninde ótinish bildirgen.

Búginde olardyń ótinishi negizinde 15 mln teńgege jýyq qarjy aýdaryldy. 

Eske salsaq, Aqtóbe oblysy boıynsha barlyǵy 652 úıdiń qurylysy júrgiziledi.