Sý tasqyny: Aqtóbeniń Qobda aýdanynda jańa úılerdiń qazyǵy qaǵyldy
AQTÓBE. KAZINFORM — Aqtóbe oblysy Qobda aýdanynda 100-den astam úı salynady. Búgin jańa úılerdiń qazyǵy qaǵyldy.
Qobda aýdanynda jańa úı salý úshin jer ýchaskeleri belgilendi. Aýdan ortalyǵyna qurylys kompanııalarynyń ókilderi baryp, aýmaqty qarady. Aqtóbe oblystyq qurylys, sáýlet jáne qala qurylysy basqarmasynyń basshysy Erjan Muzdybaevtyń aıtýynsha, Qobda aýylynda 102, Jaryq aýylynda 27 úı jaramsyz kúıge túsken.
— Qazirgi tańda Qobda aýylyndaǵy sýǵa ketken úılerdi 15 merdiger uıymǵa bólip berdik. Olar óz qarajatyna qurylys jumystaryn bastaıdy. Eki aıdyń ishinde barlyq qurylysy jumystary aıaqtalýy kerek. Jobalarǵa kelsek, munda 80 jáne 100 sharshy metrlik úıler salynady. Qobda aýdany ákimdigi turǵyndarmen kezdesýde ózara kelisim boıynsha aldaǵy ýaqytta úılerdi bólip beredi. Qazir zaýyttarmen kelisim jasalyp, kirpish, blok tastar jetkizý boıynsha jumystar júrgizilip jatyr», — deıdi Erjan Muzdybaev.
Qobda aýdanynyń ákimi Іzgilik Tynymgereev aýdan ortalyǵyndaǵy sý basqan úılerdiń tehnıkalyq jaǵdaıyn tekserý jalǵasyp jatqanyn aıtty.
— Búginde Qobda aýylynyń turǵyndarynan 284 ótinish kelip tústi. Tehnıkalyq tekserý barysynda 102 úı qalpyna keltirilmeıtini anyqtaldy, ıaǵnı, sonsha úı salý kerek. Sý basqan turǵyn úıdi tehnıkalyq tekserý jalǵasyp jatqandyqtan, bul san aldaǵy ýaqytta kóbeıýi múmkin», — dep atap ótti aýdan ákimi.
Jańa úıler sondaı-aq, Oıyl, Áıteke bı, Temir jáne Yrǵyz aýdandarynda da salynady. Buǵan deıin Oıyl aýdanynda úı salýǵa 200-den asa jer ýchaskesi berildi.