Sý tasqyny: Aqtóbedegi saıajaılarda 145 úı jaramsyz bolyp qalǵan
AQTÓBE. KAZINFORM – Aqtóbe qalasynda qazir tehnıkalyq tekserý, múlikti baǵalaý jumysy jalǵasyp jatyr. Búginge deıin 433 úı ıesine 2 mıllıard teńgege jýyq ótemaqy berildi.
Aqtóbe qalasy boıynsha Almaty jáne Astana aýdandarynan 3600-ge jýyq úıge tehnıkalyq tekserý júrgizildi. Almaty aýdany boıynsha esepke alynǵan 3544 úıdiń 324-i jeke jer úı bolsa, ózgesi saıajaı aýmaǵyndaǵy baspana.
- Qazirgi kezde Almaty aýdany boıynsha tehnıkalyq tekserý júrgen úılerdiń 2681-de baǵalaý jumysy atqaryldy. Nátıjesinde saıajaıdaǵy 145 úıdiń jaramsyz ekeni anyqtaldy. Búgingi kúni Almaty aýdany ákimdigi 385 otbasyna 1,7 mlrd teńge ótemaqy tóledi, - dedi Aqtóbe qalasy ákiminiń baspasóz hatshysy Aıgúl Baımenova.
Al Aqtóbe qalasy Astana aýdany boıynsha 50 úıge tehnıkalyq tekserý júrgizildi. Bul aýmaqta jaramsyz úı anyqtalmady. Qujaty túgel 48 otbasyna 149 mln teńgeden astam qarjy aýdarylsa, qalǵan 2 otbasyna «Qamqor - Aqtóbe 2024» qory arqyly ótemaqy tólendi.
- 100 AEK kólemindegi birjolǵy tólemdi 2942 otbasy aldy. Qazirgi kezde úıi jaramyz bolyp qalǵan adamdarǵa baspana berý jumysy naqtylanyp jatyr. Ázirge 35 úı daıyndaldy. Olarǵa úı «Ótemuratov qor» arqyly alynady. Saıajaı aýmaǵyndaǵy úıi jaramyz kúıge túskenderiniń ishinde de irikteý bolady. Jalǵyz baspanasy bolsa ǵana úı ala alady. Al eger turyp jatqan ózge úıi bolsa onda qaıta jańasyn ala almaıdy, - dedi Aıgúl Baımenova.
Aıta keteıik, Aqtóbe qalasyndaǵy baǵalaý jumysy osy aıda aıaqtalyp, qorytyndysy shyǵarylýy kerek. Qazirgi kezde úıin sý basqan qala turǵyndary 7 evakýatsııalyq pýnktte turyp jatyr.
