Sý tasqyny: Aqtóbede Jaısańbaı aýylynyń turǵyndary áli qaıyqpen qatynap júr

AQTÓBE. KAZINFORM – Aqtóbe oblysy Yrǵyz aýdany Jaısańbaı aýylynyń turǵyndary úsh aıdan beri qaıyqpen qatynap júr. Aýylda sý deńgeıi óz mólsherinen 1 metr túskenimen, áli 70-80 sm ketýi kerek. Turǵyndar keıde qaıyqqa benzın quıý úshin óz qaltasynan aqsha shyǵarady. Munda janar-jaǵarmaıdyń lıtri – 250 teńge.

Yrǵyz aýdanyndaǵy Jaısańbaı aýylynda tasjol qatynasy mamyr aıynda úzildi. Sodan beri munda tótenshe jaǵdaılar qyzmeti kezekshilik quryp, turǵyndardy sýdan ótkizý mindetin alǵan. Qazir aýylda eki matorly qaıyq bar.

 

- Sý deńgeıi túsip keledi. Óz arnasynan shamamen 1 metr 88 sm deıin kóterilip edi. Sonyń 1 metri tústi. Endi 70 sm tússe dep otyrmyz. Bir aıdyń kóleminde óz arnasyna túsýi múmkin. Turǵyndar aýylǵa jaqyn mańǵa deıin kólikpen keledi, al ótkelden qaıyqqa minip ótedi,- dedi Jaısańbaı aýyldyq okrýginiń ákimi Rýslan Qobanov.

Bul aýyl qazir aral sekildi sý ortasynda tur. Barlyǵy 74 úıde 400-den astam adam turady. 

- Qaıyqpen tasymaldaý tańerteń saǵat 6:00-de bastalady. Sodan keshki 20:00-21:00-ge deıin jumys isteıdi. Bir baǵytqa 45 mınýt ýaqyt kerek. Eki aralyqqa 1 saǵat 30 mınýt jumsaıdy. Qazir jol ashý úshin sýdy bógeýge bolmaıdy. Eger sýdy bógese, aýyl sýǵa ketýi múmkin. Jaısańbaıda jarty aı tárizdi sý ótetin edi. Sý kóp bolyp, qarama-qarsy jaǵyna ótip, aýyl ortada qalyp tur. Birneshe shaqyrymdyq jerge eshteńe isteı almaımyz, - dedi Rýslan Qobanov.

Aýyl turǵyndary qaıyqpen qatynaý qıyndyq týǵyzatynyn, ár reıs úshin janar-jaǵarmaı satyp alatynyn aıtty.

- Aýyldaǵy qatynas qıyn ekeni jasyryn emes. Aldymen qaıyqqa benzın quıamyz. Onyń 1 lıtri 250 teńge. Bir baǵyt úshin 10 lıtr kerek. 1 qaıyqqa 8 adamnan artyq almaıdy. Keıde qajet bolsa 2-3 adam bolyp ketemiz. Sodan túsken soń kólik te kerek. ÝAZ kóligine 50-60 myń beremiz. Onda 10-12 oryn bar. Munyń bári aýyl adamdary úshin shyǵyn bolyp tur. Tamaq tasý da ońǵaıǵa soqpaıdy mundaıda, - dedi aýyl turǵyny Bazargúl Beketaeva. 

Aqtóbe oblystyq TJD baspasóz qyzmetiniń habarlaýynsha, qazir eki qaıyq qyzmet etip júr. TJD qyzmetkeriniń as-sýy men benzındi jergilikti atqarýshy organ berýi tıis. Al aýyl ákimdigi keı kezde turǵyndar óz qaltasynan aqsha shyǵaryp, benzın alatynyn jasyrmady.

- Sý tasqyny bolǵan kezde janar-jaǵarmaı tonnalap keldi. Bir kúnde 300-500 lıtr benzın tutyndy. Maýsym aıynda 500 lıtr berdi. Shildede men eńbek demalysynda bolǵan soń naqty bilmeımin. Turǵyndar janymyzdaǵy Táýip aýylyna qonaqqa barady. Onyń bárin tólep berýi kerek pe? Qazir tótenshe jaǵdaılar qyzmetkerlerin baspanamen qamtyp otyrmyz. Osy adamdarǵa dep ákimdikten aqsha bólmedi. Ony men óz eńbekaqymnan beremin be? Benzın jetkiliksiz, - dedi Jaısańbaı aýyldyq okrýginiń ákimi Rýslan Qobanov.