Sý tasqyny: Aqtóbede Jaısańbaı aýylynda jaryq óship qaldy
AQTÓBE. KAZINFORM — Aqtóbeniń Yrǵyz aýdany Quılys aýylynda sý deńgeıi 6 metrden asty. Al Jaısańbaı aýylyna barar jolda búgin elektr baǵanasy qulap, aýylda jaryq óshti.
Yrǵyz aýdanynyń Quılys jáne Jaısańbaı aýyldarynda sý tasqynyna qarsy kúres jumysy jalǵasyp jatyr.
— Quılys aýylyna sý 4 sáýirden bastap keldi. Qazir bir aıdan asyp ketti. Sońǵy táýlikte sý deńgeıi 2 sm kóterildi. Jalpy sýdyń tereńdigi 6 metr bolyp ketti. Aýylda búginde er adamdar ǵana qalyp, bógetti bekitý jumysyn júrgizip jatyr. Oblys ákiminiń orynbasary kelip, kórip, qosymsha aqsha bólinetinin aıtty. Aqsha bógetti bekitýge, ony qalyńdatýǵa jumsalady.
Alǵashqy kezde halyq aqsha jınap, tehnıka jaldady. Ol aqsha bitti. Yrǵyz sýy kelgende sony paıdalanyp, endi Torǵaı ózeninen kelgen sýdan qorǵanýǵa ákimdik bólip jatyr aqshany. Sýdyń qashan qaıtatynyn aıta almaımyn, — dedi Táýip aýyldyq okrýginiń ákimi Kamal Tileýjanov.
Al Jaısańbaı aýyldyq okrýginde búgin jaryq sónip qaldy.
— Qazir aýylǵa Torǵaı ózeniniń sýy kelip jatyr. Barlyǵy 6 tehnıka jumys istep tur. Onyń tórteýi KamAZ, ekeýi tıegish tehnıka. Negizi munda Yrǵyz ózeninen sý kelip, ketti. Al Torǵaı ózeninen sýdyń kelip jatqanyna 10 kúnge jýyqtady. Torǵaı jaqtan kelgen sý tereńdigi 28 sm boldy. 9 táýlikte kóterilgeni osy. Kúnine 2-3 sm kóterilgeni baıqalady. Qazir turaqtalyp tur. Aýylda búginge deıin jaryq bolyp edi. Búgin saǵat 16:00 shamasynda Táýip pen Jaısańbaı arasyndaǵy elektr baǵany qulap, jaryq óshti. Gýmanıtarlyq kómekpen kelgen 4 generatorymyz bar. Aýdan ortalyǵymen qatynas úzildi. Oǵan 5-6 kún boldy, — dedi Jaısańbaı aýyldyq okrýginiń ákimi Rýslan Qobanov.
Onyń aıtýynsha, qazir aýylda jeke adamdardyń matorly qaıyǵy bar. Osy arqyly qajetti janar-jaǵarmaı men qajetti zattardy tasymaldaýǵa bolady. Buǵan deıin traktormen tasymaldasa, endi tek qaıyqqa súıenýge týra kelip tur.
— Sýdyń óz arnasy 1,5 metr tereń boldy. Oǵan Torǵaı ózeninen sý kelip, tereńdigi 1,78 metrge jetti. Áli 1,5 metr bıiktikte bógetimiz bar. Uzyndyǵy 3 shaqyrym bolady. Bóget jarty aı tárizdi, aýyldyń bir jaq bóliginde ornalasqan. Jaıylma sý jan-jaǵynan qaýip tóndirip tur. Aýyl halqy biraýyzdan kóshpeı, elde qaldy. Negizi evakýatsııa jasalatyny aıtyldy. Qazir kúni-túni kúzet bar. Aýylda 412 adam turady, — dedi Rýslan Qobanov.
Aıta keteıik, aýyldan 20 shaqyrym qashyqtyqta Qurdym oıpańy bar. Munda sý barǵanyna 5 kún bolǵan. Aýyl turǵyndary sý Qurdymǵa jetse, jerastyna sińip ketetinin aıtyp otyr.
Aıta keteıik, oblys ákiminiń orynbasary Asylbek Esenbaev Yrǵyz aýdanynyń Quılys aýylyna baryp, sý tasqyny ahýalymen tanysty. Aýyldyń er-azamattary, TJM áskerı qyzmetkerleri bógetti nyǵaıtý jumystary jalǵasyp jatyr. 3,5 shaqyrym bógetke 80 myń jana qap qoldanylǵan.
Eske salaı keteıik, Yrǵyzdyń Nura, Belsher, Mamyr aýyldaryna sý kirdi. Aýdanda 152 úı jaramsyz dep tanylǵan.
