Sý tasqyny: Aqtóbede taǵy bir aýyl taratylýy múmkin
AQTÓBE. KAZINFORM – Aqtóbe oblysy Yrǵyz aýdanynyń Mamyr aýyly taratylýy múmkin. Qazir bul aýylda sýǵa ketken 25 úı ıesiniń teń jartysyna jýyǵy kóshýge sheshim qabyldaǵan. Jergilikti ákimdik qalǵandaryna Saryoba jerinde salynyp jatqan Nura aýylyna qonystanýǵa usynys aıtty.
Yrǵyz aýdanynda barlyǵy 125 úı salynyp jatyr. Sonymen birge 33 úı satyp alyndy. Al 7 úı qaıta qalpyna keltirýge jaramdy. Úı qurylysy jumystaryn barlyǵy 16 merdiger mekeme atqaryp jatyr. Yrǵyz aýdany boıynsha Nura, Mamyr, Belsher aýyldarynda tasqyn sý úılerge kirip, buzdy. Qazirgi kezde nuralyqtar kóshetin Saryobada qurylys júrip jatyr. Al Mamyr aýylynda bir aı buryn úı qaǵyzyǵy qaǵylǵanymen, turǵyndar men ákimdik bir toqtamǵa kele almaı otyr.
- Mamyr aýylyna qatysty sheshim áli tolyq shyqpady. Jańa oqý jylynda munda 15 bala qalaıyn dep tur. Sol 15 oqýshyǵa 1, ári ketkende 2 muǵalim sabaq beredi. Aýylda 22 muǵalim bolsa, sonyń 20-sy jumyssyz qalaıyn dep tur. Jumysy joq adam kóshkisi keledi. Ol jaqqa jańadan úı salǵanymen qaıta kóship ketse, tıimsiz sheshim bolady. Osy jaıtty aýdan ákimi halyqpen kezdesýde túsindirdi. Turǵyndar alǵashqyda kósheýge kelisim berip, qolhat da jazdy. Sol baǵytta jumys isteı bastaǵanda qaıta kelip, «aýylda qalamyz, aýyldy joǵaltqymyz kelmeıdi» dep jatyr. Aqtóbe oblystyq bilim basqarmasy, densaýlyq saqtaý basqarmasy, mádenıet basqarmasy ókilderiniń qatysýymen taǵy da kezdesý bolady. Qaıta oılanyp, sheshim shyǵarady, - dedi Yrǵyz aýdany ákiminiń orynbasary Asqar Ýálı.
Aıta keteıik, Mamyr aýylynda barlyǵy 36 úı boldy. Onyń 26-i sýǵa ketti.
- Mamyr aýylynan kóshemiz degen adamdardyń bir bóligi aýdan ortalyǵy, bir bóligi Saryoba jerindegi Nura aýylyna qonys aýdarady dep kelisildi. Sol kelisim qalsa dep oılaımyz. Al eger sol aýylda qalamyz dese, úı salyp, qurylysty aıaqtaý qıynǵa soǵady. Usynystyń aıtylǵanyna, kelisim bergenine bir aı boldy, - dedi Asqar Ýálı.
Eske salsaq, buǵan deıin Oıyl aýdanynyń Ekpetal aýyly taratyldy. Ol aýyldyń turǵyndary aýdan ortalyǵyna qonys aýdardy.
