Sý tasqyny: Aqtóbede mal shyǵyny ótelip jatyr

AQTÓBE. KAZINFORM – Aqtóbede esep boıynsha 3232 bas mal qyryldy. Qazir 677 bas malǵa 89,1 mln teńge aýdaryldy.

Óńirde tótenshe jaǵdaılardyń aldyn alý jáne olardy joıý komıssııasy jumys istep jatyr. Shyǵyndy esepteýmen qatar óteý de qolǵa alynǵan.

- Aldymen maldyń quny anyqtalady. Ol úshin statıstıka departamentiniń aýdandyq fılıal ókilderi maldyń jas ereksheligine baılanysty naryqtyq baǵany aıtady. Bul derek olarda bolady. Sol derekke sáıkes maldyń ótemaqysy anyqtalady. Aýdandaǵy tótenshe jaǵdaılardyń aldyn alý jáne olardy joıý komıssııasy akti jasap, sheshim shyǵarǵan soń qarjy aýdarylyp jatyr. Qazir 677 bas mal ıesine 89,1 mln teńge qarjy aýdaryldy. Jumys jalǵasady, - dedi Aqtóbe oblystyq Aýyl sharýashylyǵy jáne jer qatynastary basqarmasy basshysynyń orynbasary Rústem Ótesh. 

Aıta keteıik, sý tasqyny kezinde qyrylǵan mal ótemaqysyn tóleýdiń algorıtmi bar. Ol úshin óleksesi, syrǵasy bolýy kerek. Ári aýyl sharýashylyǵy bazasynda tirkelgeni rastalady.

Eske salsaq, Aqtóbe oblysy ákimdigi mal shyǵynyn óteý úshin respýblıkalyq bıýdjetten 2,2 mlrd teńge surady.