Sý tasqyny: Aqtóbede Quılys aýylynyń turǵyndary úılerine oralyp jatyr

AQTÓBE. KAZINFORM – Eki aı buryn aýyldan aýdan ortalyǵyndaǵy evakýatsııalyq pýnktke qonys aýdarǵan turǵyndar búgin úıine oralyp jatyr. Quılys aýylynyń balalary men áıelder, qart kisiler sáýir aıynyń basynda kóshirilgen bolatyn.

Yrǵyz aýdanynyń Nura, Mamyr, Belsher aýylyna sý kirse, turǵyndar men áskerıler, tótenshe jaǵdaılar qyzmetkerleri Quılys pen Jaısańbaı aýyldaryn saqtap qaldy. Buǵan deıin habarlaǵanymyzdaı, Quılys aýylynda tasqynǵa qarsy kúres jumystary 4 sáýir kúni bastaldy. Sodan beri er adamdar bógetti bekitý jumystaryn júrgizdi.

– Qazirgi ýaqytta Táýip aýyldyq okrýginiń ortalyǵy Quılys aýylynyń turǵyndary kóshirilip jatyr. Oǵan 6 ÝAZ kóligi uıymdastyryldy. Ár mashınaǵa 10-12 adam minedi. Shamamen saǵat 15:00-de qozǵaldy. Aýylǵa kirer jol buzylǵan. Sol úshin de bóget salynyp, qatynas jandandy, - dedi Yrǵyz aýdanynyń ákimi Nurlan Qyzbergenov.

Aıta keteıik, Yrǵyz aýdany boıynsha Mamyrda 15, Belsherde 4, Nurada 68 úı qulady. Aýdanda tasqynnan zardap shekken turǵyndarǵa áli de 100 AEK kóleminde birjolǵy tólem aýdarylyp jatyr.