Sý tasqyny: Aqtóbede bir aýylǵa feldsherlik pýnkt salynyp, ekeýi jóndeledi
AQTÓBE. KAZINFORM – Kóktemgi sý tasqyny kezinde Aqtóbede 4 emdeý ornyna sý kirdi. Onyń ekeýi múlde jaramyz bolyp qaldy. Qalǵan eki nysan jóndeledi.
Aqtóbe oblysy boıynsha barlyǵy 4 emdeý ornyna sý kirgenimen, onyń bireýi múlde qaıta jańartylmaıdy. Sebebi Oıyl aýdany Ekpetal aýyly taratylyp, halqy aýdan ortalyǵyna kóshti. Al aı boıy sýda turǵan Yrǵyz aýdany Nura aýyldaǵy dárigerlik ambýlatorııa endi Saryoba jerine salynady.
- Yrǵyz aýdany Nura aýylyndaǵy emdeý orny «Aýylda densaýlyq saqtaýdy jańǵyrtý» pılottyq ulttyq jobasy aıasynda salynady. Nysannyń jobalyq-smetalyq qujattamasy daıyndalyp, qurylys bastaldy. Tapsyrys berýshi - Aqtóbe oblysynyń Qurylys, sáýlet jáne qala qurylysy basqarmasy,- dep habarlady Aqtóbe oblystyq Densaýlyq saqtaý basqarmasynyń baspasóz qyzmeti.
Al Oıyl aýdany Qaratal aýylyndaǵy Bersıev dárigerlik ambýlatorııasy jóndeýge jaramdy dep tanyldy. Bul ǵımarat 2007 jyly salynǵan. Munda barlyǵy myńnan astam adam tirkelgen. Aýdan ortalyǵy Oıyldan 25 shaqyrym qashyqtyqta ornalasqan aýyldaǵy emdeý orny 2020 jyly jóndelgen.
- Sý tasqyny kezinde Bersıev dárigerlik ambýlatorııasynyń ishine sý kirip, 30 sm kóterildi. Búgingi kúni tehnıkalyq saraptama ótkizildi. Edeni, aǵash esikteri jaramsyz. Qabyrǵasy sýlanyp, sylaǵy túsken. Ǵımarattyń tozýy 49,6% quraıdy. Baǵalaý qorytyndysy boıynsha aǵymdaǵy jóndeý jumystary qarastyrylǵan. Qalpyna keltirý jumystary Oıyl aýdandyq aýrýhanasynyń jeke qarajat esebinen júrgizýge sheshim qabyldandy,- dep habarlady Aqtóbe oblystyq Densaýlyq saqtaý basqarmasynyń baspasóz qyzmeti.
Al Aqtóbe qalasy Órleý aýylyndaǵy dárigerlik ambýlatorııasy jóndeýden ótip, qaıta paıdalanýǵa berildi. Biraq bul ýaqytsha ǵana amal. Sebebi dárigerlik ambýlatorııa ǵımaraty oıpatty jerde ornalasqanyn. Munda jyl saıyn sý kiredi. Qazir tozýy 87 % qurap otyr. Búgingi tańda jańa ǵımarat salý jóninde sheshim qabyldandy. Aldymen jer máselesi sheshilýi tıis.
Eske salsaq, Aqtóbede oblystyq, aýdandyq mańyzy bar joldarda tasqynnan keıingi qalpyna keltirý jumysy júrgizilip jatyr. Bıyl kóktemde sý ótý, sý shaıý boıynsha barlyǵy 51 fakti tirkelgen.
