Sý tasqyny: Aqtóbede Áıteke bı aýdanynyń turǵyndary jańa úıge qonystandy
AQTÓBE. KAZINFORM – Áıteke bı aýdanynda 26 úıdiń qurylysy aıaqtaldy. Baspanasy sýǵa ketken turǵyndar búgin jańa úıdiń kiltin aldy.
Áıteke bı aýdany T.Júrgenov aýylynda barlyǵy 26 úı salyndy. Qurylysqa qarjyny Bi Group kompanııasy bólip, 2 aıdan astam ýaqytta turǵyndar jańa baspanaǵa qonystanyp jatyr.
- Bıyl 30 naýryz kúni saǵat 04:00-de úıge sý kirdi. Odan keıin baǵalaýshylar kelip, úıdi jaramsyz dep aıtty. Sodan týma-týysymnyń úıine baryp, páter jaldap turdym. Arada eki aı ótken jańa úıge qol jetkizdik. Otbasymda 7 jan turamyz. Tórt balam bar, anamyz janymyzda. Materıaldyq shyǵyn retinde 553 myń teńge berdi. Negizi qurylys bastalǵan kezde bizge kim qaı úıge qonystanatynyn aıtyp, «qarap, sapasyn baqylaýǵa bolady» dep aıttyz. Biz dál solaı jasap, tipti ózim qora da salyp aldym, - dedi Áıteke bı aýdanynyń turǵyny Baqyt Islamov.
Jańa úılerdiń kiltin Áıteke bı aýdanynyń ákimi Daýletııar Toǵyzbaev tabystady. Ol merdiger kompanııalarǵa az ýaqytta sapaly nátıje kórsetkeni úshin alǵysyn jetkizdi. Merdigerler men Bi Group kompanııasy áıtekebılik jańa qonys ıelerine turmystyq tehnıkany syılyqqa berdi. Turǵyn úı qurylysyna 751,4 mln teńge jumsalǵan.
- Jańa úı óte keremet, sapaly salynǵan. Biz sý tasqyny kezinde qyzdarymyzdyń úıine baryp turdyq. Al sý ketken soń eski úıimizdi qaıta panaladyq. Osy kúnge deıin amaldap turyp, jańa úıge kóship kelip otyrmyz. Qurylys kezinde kún saıyn tekserip, qarap turǵanymyz ras. Balam ishinde júrip, kómektesti. Qurylysshylar da aqyldasyp otyrdy. Bizge bári unady, - dedi Bazargúl Nurjanova.
Aıta keteıik, aýdanda 150-ge jýyq aryz túsip, komıssııanyń tehnıkalyq baqylaýy nátıjesinde 64 jóndeý jumystaryna tıisti qarajaty bólindi. 51 úı turýǵa jaramsyz dep tanyldy. B.Ótemuratov qorynyń qoldaýymen 25 otbasy ekinshi naryqtaǵy úıdi alýǵa ynta bildirip, osydan 2 aı buryn baspanaly boldy.
