Sý tasqyny: Aqtóbede 92 úı qırap qaldy
AQTÓBE. KAZINFORM – Sý tasqyny kezinde oblysta 92 úı jaramsyz bolyp qaldy. Qazirgi kezde Qarǵaly ózeninde sý kóterilip, qala mańyndaǵy baý-baqsha ujymdarynyń turǵyndary evakýatsııalanyp jatyr.
Aqtóbe oblysy boıynsha búginge deıin 792 úıge sý kirgen. Ázirge 92 úıdiń qırap qalǵany belgili. Sonymen 26 áleýmettik nysan da tasqyn sý kezinde búlindi.
Aqtóbe oblysy ákimi baspasóz qyzmetiniń habarlaýynsha, barlyǵy 15 myńnan astam adamǵa arnalǵan 86 ýaqytsha qabyldaý pýnkti daıyndaldy. Búginde sý tasqyny qaýipi bar aımaqtan 8978 adam, onyń ishinde 3597 bala kóshirildi. Al qalada qazir Qarǵaly ózeniniń kóterilýine baılanysty birneshe saıajaı aýmaǵynan turǵyndar evakýatsııalanyp jatyr.
- Qala boıynsha evakýatsııalyq ortalyqtarda 1401 adam bar, onyń 615-i bala. Onyń 200-den astamy keshe túnnen bastap evakýatsııalandy. Olar Stroıtel-7, Solnyshko, Gıdrogeolog, Gaýhar, Abrıkos, Nadejda baý-baqsha ujymdarynyń turǵyndary, - dep habarlady Aqtóbe qalasy ákiminiń baspasóz qyzmeti.
Eske salsaq, keshe Maǵajdan bógeti buzylyp, túnde evakýatsııalaý jumystary bastalyp, búgin jalǵasty. Oǵan kólikpen qatar tikushaq jumyldyryldy. Turǵyndar Besqospa aýyly men Bestamaqtaǵy evakýatsııalyq pýnktterge jetkizildi.
