Sý tasqyny: Aqtóbede 72 kásipkerlik sýbektisinen ótinish tústi
AQTÓBE. KAZINFORM – Aqtóbe oblysynda sharýalar men jeke kásipkerlerden ótinish qabyldanyp jatyr. Óńirlik kásipkerler palatasynda jedel shtab jumys istep tur.
Aqtóbe oblysynyń kásipkerler palatasyna 72 bıznes sýbektisi júgindi. Onyń 64-i aýdandarda ornalasqan.
- Qalada jáne aýdandarda tótenshe jaǵdaı jarııalanyp, qujattardy daıyndaý, zalaldy tirkeý úshin keńes berý bastalyp ketti. «Atameken» palatasy fılıaldarynyń aýdandyq dırektorlary komıssııa quramynda bar. Olar ótinishterdi qabyldaý kezinde kásipkerler men sharýalarǵa barady. Máselen Oıylda 24 sharýa qojalyǵy, bir alma baǵy búlingen. Qobdada 13 sharýa qojalyǵy tirkeldi. Sonymen birge kempıng, azyq-túlik dúkenderine de sý kirgen. Yrǵyz aýdanynda 2 sharýa qojalyǵy, Muǵaljar aýdanynda azyq-túlik dúkeni, dámhana, monsha bar. Temir aýdany boıynsha 13 sharýa qojalyǵy, Alǵada bir sharýa qojalyǵy tirkeldi. Kóbinese iri qara men usaq mal qyrylyp qalǵan. Áli de kóptegen qystaý sý astynda tur. Naqty sanyn aıtý qıyn, - dedi Aqtóbe oblysy Kásipkerler palatasy kásipkerlerdiń quqyǵyn qorǵaý jáne ákimshilik kedergilerdi azaıtý bóliminiń basshysy Rahat Tájibaev.
Al Aqtóbe qalasy boıynsha 8 bıznes sýbektisi tasqyn sýdan zardap shekti. Olardyń arasynda bótelkedegi sý óndiretin tseh pen meıramhana, kilem jýý tsehy, azyq-túlik dúkeni, jıhaz tsehy, qoıma bar.
- Sý tasqynynan zardap shekken kásipkerlerge naqty kómek kórsetý úshin qarjy jınalyp jatyr. Barlyq nıet bildirýshiler «Kúshimiz birlikte» qoǵamdyq birlestigine aqsha aýdara alady, - dedi Rahat Tájibaev.
