Sý tasqyny: Aqtóbede 184 bıznes sýbektisi zardap shekti
AQTÓBE. KAZINFORM - Sý tasqyny kezinde Aqtóbe oblysynda 184 bıznes sýbektisine zaqym kelse, onyń 50-i qalada. Kóbi aýyl sharýashylyǵy qurylymdary men qyzmet kórsetý salasyna tıesili.
Aqtóbege «Atameken» UKP basqarma tóraǵasynyń orynbasary Tımýr Nahıpbekov pen Ulttyq ekonomıka mınıstrliginiń ókilderi kelip, sý tasqyny kezinde zardap shekken bıznes nysandarynyń ıelerimen kezdesti. Aqtóbe oblysy boıynsha 184 bıznes sýbektisiniń shyǵyny shamamen 3,9 mlrd teńge. Shyǵyn týraly naqty derek tek baǵalaý komıssııasynyń qorytyndysynan soń belgili bolady. Tımýr Nahıpbekov pen QR UEM kásipkerlikti damytý departamentiniń dırektory Nurbol Jańabekovpen birge Aqtóbe qalasy Almaty aýdanyndaǵy shaǵyn jáne orta kásipkerligin tekserý komıssııasynyń baǵalaýshylary jáne advokattarmen kezdesý ótkizdi. Keıin sý tasqyny kezinde zardap shegip, toqtap turǵan nysan ıelerine túsindirý jumysyn júrgizdi. Máselen demalys bazasynyń ıesi jańa maýsym ashylmaı turyp shyǵyn ótelse, jumysyn qaıta jalǵastyrýǵa nıetti.
«Qańtar oqıǵasy kezindegi erejeni negizge alyp, shyǵyndy óteý tetigi daıyndaldy. Kezdesý kezinde usynystar bolsa qabyldyp, talqylaýymyz kerek. Shyǵyndy óteý mehanızmi kezinde bıýrokratııaǵa jol bermeý jaǵy qarastyryldy. Ony Ulttyq kásipkerler palatasymen birge ázirledik», - dedi QR UEM kásipkerlikti damytý departamentiniń dırektory Nurbol Jańabekov.
Aqtóbe oblysy ákiminiń orynbasary Ǵalymjan Eleýovtiń aıtýynsha, qazir aýyl sharýashylyǵy qurylymdarynyń shyǵynyn óteý úshin bólek ereje daıyndalyp jatyr.
