Sý tasqyny: Aqtóbe oblysynyń Qobda aýdanynda jańa úılerdiń irgesi qalanyp jatyr

ASTANA. KAZINFORM – Aqtóbe oblysy Qobda aýdanynda sý tasqynynan úısiz qalǵan turǵyndarǵa jańa baspana salý qolǵa alyndy.

«Búginde aýdan boıynsha úıin sý basqan turǵyndardan 292 ótinish kelip tústi, arnaıy komıssııa jumysyn jalǵastyrýda. Qazir 120-dan astam úıdiń qurylysy bastalýy kerek, aýdan boıynsha apattyq jaǵdaıda 150 úı tirkeldi», - dedi Qobda aýdanynyń ákimi Іzgilik Tynymgereev «Biz birgemiz» telemarafonynda «Habar» telearnasyna suhbat berip. 

Turǵyn úıler shamamen 2 aı kóleminde qoldanysqa berilýi tıis. Qurylys qarqyny jergilikti bıliktiń baqylaýynda. 

Aıta ketsek, sý tasqynynyń zardabyn shekken 5 myńnan astam otbasyǵa ataýly áleýmettik kómek avtomatty túrde taǵaıyndaldy. 

Sondaı-aq, tótenshe jaǵdaı jarııalanǵan óńir jastarynyń nesıesin óteý keıinge shegerildi.