Sý tasqyny: Aqtóbe oblysynda 1 966 adam ótemaqy aldy
ASTANA. KAZINFORM – Aqtóbe oblysynda sý tasqynynan zardap shekken 1 966 otbasy 638 mln teńgeden astam birrettik ótemaqy aldy. Bul týraly Aqtobe oblysy ákiminiń baspasóz hatshysy Gúlbaǵda Kóbeeva aıtty.
«Kóktemgi sý tasqynyna baılanysty oblysymyzdyń alty aýdany men Aqtóbe qalasynda jergilikti aýqymdaǵy tabıǵı sıpatqa ıe tótenshe jaǵdaı jarııalandy. Yrǵyz aýdanynda sý tasqynyna qarsy sharalar atqarylýda. Bul jaqta 81 úıdi sý basqan edi. 23 sáýirde Yrǵyz aýdanynda jaǵalaýdy nyǵaıtý jumystary júrgizilýde», - dedi ol Ortalyq kommýnıkatsııalar qyzmetindegi brıfıngte.
Onyń dereginshe, oblystaǵy Belsher kenti tusyna 90 dana qap , 30 tonna ınertti materıal, Quılys aýylynda 310 dana qap, 110 tonna ınertti materıal, Jaısanbaı aýylynda290 dana qap, 110 tonna ınertti materıal tóseldi. Yrǵyz aýdanyna gýmanıtarlyq kómek retinde azyq-túlik, dári-dármek, tósek-oryn, barlyq qajetti zat jetkizildi. Sondaı-aq, osy aýdanynda birrettik áleýmettik tólem alýǵa 10 adam nıet bildirdi. Barlyǵyna 100 aılyq eseptik kórsetkishti quraıtyn qarjy, ıaǵnı 3 mln 700 myń teńge jiberildi.
«Osy sý tasqynynan zardap shegip, ómirlik qıyn jaǵdaıǵa tap bolǵan otbasylarǵa birjolǵy áleýmettik tólem berý jumystary jalǵasady. Jergilikti ókiletti organdardyń sheshimderi negizinde búgingi kúni Aqtóbe qalasy men Áıteke bı aýdanynyń turǵyndaryna 300 myń teńge, qalǵan aýdandarǵa 369 myń teńge berilýde. Ótemaqyny oblys boıynsha 1 966 azamat aldy. Jalpy tólem somasy 638 mln 862 myń teńgeni quraıdy. Ótemaqy berý boıynsha eń kóp ótinish túsken aımaqtar qatarynda Aqtóbe qalasy (1 151 ótinish), Oıyl (350), Qobda (200) aýdandary bar. Mamandar bir kúnde 140-qa deıin ótinishti qarap, qarjyny ótinish ıeleriniń shottaryna qarajat jiberip jatyr», - dedi Gúlbaǵda Kóbeeva.
