Sý tasqyny. Aqmolanyń Staryı Kolýton aýylynda kólik qatynasy úzildi
ASTANA. KAZINFORM — Qutqarý jumystaryna jeke quramnyń 70-ke jýyq adamy, 20 TJM arnaıy tehnıkasy, JAO jáne eriktiler jumyldyryldy, dep habarlaıdy Aqmola oblysy TJD.
Qazaqstan TJM qutqarýshylary Aqmola oblysynyń Astrahan aýdanynda Qalqutan ózeniniń tasýyna baılanysty kólik qatynasy úzilgen Staryı Kolýton aýylynda jedel jumystardy jalǵastyryp jatyr.
Qutqarýshylardyń úılesimdi áreketteriniń arqasynda ótken táýlikte 21 adam, onyń ishinde 1 júkti áıel motorly qaıyqtardyń kómegimen tasymaldandy.
Sý tasqynyna qarsy jumystardyń barysyn TJ vıtse-mınıstri Ramıl Kamalov tekserdi.
— Jaǵalaý syzyǵyn nyǵaıtý jáne odan ári sý basýǵa jol bermeý úshin ınertti materıaldary bar 1000-nan astam qap tóseldi, 300 tekshe metr sý soryldy. 21 sıyr men 100-ge jýyq qoshqar qaýipsiz jerge aıdaldy. Qutqarý jumystaryna jeke quramnyń 70-ke jýyq adamy, 20 TJM arnaıy tehnıkasy, JAO jáne eriktiler jumyldyryldy. Jaǵdaı TJM baqylaýynda. Qutqarý jáne nyǵaıtý is-sharalary táýlik boıy jalǵasyp jatyr, — delingen habarlamada.
Osyǵan deıin Aqmolada jabylǵan jol ýchaskesin aınalyp ótpek bolǵan kólik sýǵa batyp ketkenin jazǵan edik.