Sý tasqyny: 6 oblysta respýblıkalyq mańyzy bar 13 jol jabyldy

ASTANA. KAZINFORM — QazAvtoJol respýblıkalyq mańyzy bar avtomobıl joldaryndaǵy sý tasqyny týraly aǵymdaǵy aqparatty jarııalady.

«12 sáýirde saǵat 19:00–degi jaǵdaı boıynsha halyqaralyq jáne respýblıkalyq mańyzy bar avtomobıl joldarynda aýa raıynyń jylynýy men qardyń tez erýi saldarynan 5 oblysta (Aqmola, SQO, Atyraý, Qostanaı, ShQO) 7 jol júrý ýchaskesinde jalpy uzyndyǵy 8715 metr bolatyn sý tasqyny oryn aldy.

6 oblystaǵy (Aqtóbe, Aqmola, Atyraý, Qostanaı, Mańǵystaý, SQO) respýblıkalyq mańyzy bar 13 avtomobıl joldarynda (uzyndyǵy 618 km) qozǵalysqa shekteý qoıyldy», — dep jazdy vedomstvodan.

Qazirgi tańda respýblıkalyq joldarda 724 birlik tehnıka men 1851 adam jumyldyrylǵan.