Sý tasqyny: 5 961 adam áli kúnge deıin evakýatsııalaý pýnktterinde otyr
ASTANA. KAZINFORM – Búginde elimizde sý tasqynynan zardap shekken 5 961 adam áli kúnge deıin evakýatsııalaý pýnktterin panalap otyr. Bul týraly Ortalyq kommýnıkatsııalar alańynda ótken brıfıngte QR Tótenshe jaǵdaılar mınıstrliginiń ókili Asqar Shárip aıtty.
Belgili bolǵandaı, 8 189 turǵyn úı men 2 977 aýla aýmaǵynan sý sorylyp, syrtqa shyǵarylǵan. 7,7 mln qapshyq jáne 1,5 mln astam tonna ınertti materıal tóselgen.
Sý tasqynyna qarsy sharalar jalǵasyp jatyr.
«Atyraý oblysynda Jaıyq ózeni sý deńgeıine monıtorıng júrgizilýde. Bógetterdi nyǵaıtý jumystary jalǵasyp jatyr. Jaıyq ózeni jaǵasynyń sýmen shaıylýynyń aldyn alý úshin munaı-gaz kompanııasynyń kúshteri men quraldary jumyldyrylyp, uzyndyǵy 600 metr teńizdiń bógegish bondary jaǵaǵa jaqyn ornatyldy», - dedi Asqar Shárip.
Onyń aıtýynsha, Shyǵys Qazaqstan oblysynda jaýyn-shashynnyń kóp mólsherde túsýine baılanysty Buqtyrma ózeninde sý deńgeıi kóterilgen. Saldarynan Altaı aýdanynyń Zýbovsk aýdanynda 24 aýla aýmaǵyn sý basty.
«Bógetterdi bekitý jáne sý basqan aýmaqtardan sý sorý jumystary júrgizilýde. Búginde Buqtyrma ózeniniń sý deńgeıi tómendep keledi. Ózenniń sý deńgeıine monıtorıng jalǵastyrylýda», - dedi ol.
