Sý tasqyny: 43 myńnan astam adam úılerine oraldy
ASTANA. KAZINFORM – Respýblıka boıynsha 43 015 adam úılerine oraldy. Bul týraly TJM ókili Asqar Shárip aıtty.
«Atyraý oblysy baqylaýda. Jaıyq ózeni sý deńgeıine monıtorıng jalǵastyrylýda. Sý tasqyny jaǵdaıynyń monıtorıngi dronnyń kómegimen júzege asyrylady. Bógetterdi nyǵaıtý jumystary júrgizilip jatyr. Ótken táýlikte 70 úıden sýdyń baǵyty burylyp, sý soryldy, 202 myń qapshyq tóseldi», - dedi ol Ortalyq kommýnıkatsııalar qyzmetindegi brıfıngide.
Onyń atap ótýinshe, osy saǵatta respýblıka boıynsha 43 015 adam óz úılerine oraldy. 6 338 adam evakýatsııalaý pýnktterinde. Soltústik Qazaqstan, Atyraý jáne Aqtóbe oblystarynda 7 710 turǵyn úı men 2 844 aýla aýmaǵynan sýdyń baǵyty burylyp, sý soryldy. Avarııalyq-qutqarý jáne sý tasqynyna qarsy jumystarǵa 14 myńnan astam adam, 1 529 tehnıka, 226 sý sorý quraly jáne 100 júzý quraly, 6 áýe kemesi jumyldyryldy.
«Shyǵys Qazaqstan oblysynda jaýyn-shashynnyń kóp mólsherde túsýine baılanysty Buqtyrma jáne Kishi Úlbi ózenderinde sý deńgeıi kóterildi. Altaı jáne Glýbokovskıı aýdandaryna TJD, TJM 68303 áskerı bólimi men Apattar medıtsınasy ortalyǵynyń kúshteri men quraldary jiberildi. Aerovızýaldy barlaý júrgizilýde», - dedi Asqar Shárip.
