Sý tasqyny: 38 myńnan astam turǵyn úıine qaıta oraldy
ASTANA. KAZINFORM – Elimizde sý tasqynynan zardap shekken 38 254 adam óz úılerine oraldy, 6 727 adam evakýatsııalaý pýnktterinde qalyp otyr. Bul týraly QR TJM ókili Asqar Shárip baıandady.
Onyń aıtýynsha, Astana qalasynan, Túrkistan jáne Qostanaı oblystarynan Soltústik Qazaqstan oblysyna kómekke barǵan tótenshe jaǵdaılar mınıstrligi kúshteri men quraldarynyń bir bóligi turaqty ornalasý oryndaryna qaıtarylyp jatyr. Azamattyq qorǵaý qyzmetteri Atyraý, Aqtóbe, Aqmola, Batys jáne Soltústik Qazaqstan oblystaryna sý tasqynyna qarsy is-sharalar, saldardy joıý jáne halyqqa kómek kórsetý jumystary jalǵasyn taýyp jatyr.
«Sý tasqyny bastaǵaly beri 12,8 mln astam tekshe metr erigen qar sýy soryp shyǵaryldy, 6,6 mln astam qapshyq jáne 1,5 mln astam tonna ınertti materıal tóseldi. Atyraý oblysynda Jaıyq ózeni sý deńgeıine monıtorıng jalǵasýda. Bógetterdi nyǵaıtý jumystary júrgizilip jatyr. Ótken táýlikte Inder, Mahambet, Isataı, Qurmanǵazy aýdandarynda 500 myń qapshyq, 1 510 tonna ınertti materıal tóseldi. Qulsapry qalasynda sý basqan aýmaqtan 196 055 tekshe metr sý soryldy», - dedi A.Shárip Ortalyq kommýnıkatsııalar qyzmetinde.
Avarııalyq-qutqarý jáne sý tasqynyna qarsy jumystarǵa 20 309 adam, 2 783 tehnıka, 584 sý sorý jáne júzý quraly, 8 áýe kemesi jumyldyrylǵan.
Aqtóbe, Batys Qazaqstan, Aqmola, Atyraý, Soltústik Qazaqstan oblystarynyń TJ departamentterinde jedel jeli telefondary qyzmet kórsetip jatyr. Jedel jeli telefondaryna 2 250 qońyraý tústi.
Evakýatsıalyq pýnktterde Tótenshe jaǵdaılar departamentteriniń, TJM Apattar medıtsınasy ortalyǵynyń psıhologtary men medıtsınalyq qyzmetkerleri azamattarmen jumys júrgizýdi toqtatqan joq.
