Sý tasqyny: 18 651 adam úıine oraldy

ASTANA. KAZINFORM – Sý tasqyny qaýipti óńirlerde avarııalyq-qutqarý jumystary, sý tasqynyna qarsy is-sharalar, sý tasqyny saldaryn joıý jumystary áli jalǵasyp jatyr. Sý tasqynyna qarsy is-sharalardyń nátıjesinde 18 651 adam óz úılerine oralǵan.

Ortalyq kommýnıkatsııalar qyzmetinde ótken brıfıngte QR TJM Azamattyq qorǵanys jáne áskerı bólimder komıtetiniń aǵa ofıtseri Erasyl Saıpash sý tasqyny bastalǵaly beri 117 694 adam, onyń ishinde 43 931 bala qutqarylyp, evakýatsııalanǵanyn aıtty.

«Qazir 6 887 adam, onyń ishinde 3 166 bala evakýatsııalaý pýnkterin qonys etken. 4 216 turǵyn úı men 2 698 aýla aýmaǵynan sýdyń baǵyty buryldy. 10,1 mln astam tekshe metr erigen qar sýy soryp shyǵaryldy, 3,2 mln qapshyq jáne 1,4 mln astam tonna ınertti materıal tóseldi», - dedi ol.

Belgili bolǵandaı, Aqtóbe, Qostanaı, Aqmola, Atyraý, Soltústik Qazaqstan oblystarynda 5 718 jeke turǵyn úı, 1 130 aýla aýmaǵy áli sý astynda qalýda. 

Aqtóbe, Qostanaı, Batys Qazaqstan, Aqmola, Qaraǵandy, Atyraý, Soltústik Qazaqstan jáne Ulytaý oblystarynda jergilikti aýqymdaǵy 38 TJ áreket etedi. 

TJM azamattardy sý tasqyny kezeńinde qaýipsizdik sharalaryn saqtaýǵa, úılerden jáne evakýatsııalaý pýnktterinen tıisti ruqsatsyz ketpeýge shaqyrady jáne balalardy qaraýsyz qaldyrmaýdy eskertedi.