Sý tasqanyna qarsy 45 poıyz jasaqtalyp jatyr

NUR-SULTAN. QazAqparat – Elimizde sý tasqanyna qarsy 45 poıyz jasaqtalyp jatyr. Bul týraly búgin Úkimet otyrysynda QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.

«Poezdardyń úzdiksiz jáne qaýipsiz qozǵalysyn qamtamasyz etý, joldardy, ǵımarattardy ýaqtyly daıyndaý maqsatynda «Qazaqstan temir joly» ulttyq kompanııasynyń buıryǵy bekitilgen. Onda sý tasqyny kezinde jol qaýipsizdigin, joldyń jáne ǵımarattardyń turaqty jumysyn qamtamasyz etýdiń uıymdastyrý-tehnıkalyq is-sharalary qarastyrylǵan. Aýmaqtyq uıymdarmen birlesip, sý qoımalarynyń jaıy, agrotehnıkalyq dambalar tekserilýde. Sondaı-aq, kúrdeli jaǵdaı týyndaǵan jaǵdaıda tótenshe jaǵdaılar jónindegi oblystyq qurylymdarymen ózara áreket etý jumystary júrgizilýde», - dedi ol.

Mınıstrdiń aıtýynsha, ótken jyldardyń taldaýyna sáıkes, tasqyn sýlardy ótkizý boıynsha barlyq aýmaqtarda 673 qaýipti jerdiń tizimi anyqtalǵan. Sý tasyǵan kezde táýlik boıy jaýapty tulǵalardyń kezekshiligi uıymdastyrylady. Olar qaýipti jerlerdi aınalyp, qosymsha tekserip shyǵady.

«Kópirlerdiń, qubyrlardyń, drenajdy qudyqtardyń tesikterin qardan tazalaý, taýdy jáne sý burǵysh aryqtardy, naýalardy jáne kıývetterdi ashý boıynsha daıyndyq jumysy bastaldy. Kesek tastar, relsti paketter, standartty emes temirbeton shpaldar tıelgen sý tasqanyna qarsy 45 poıyz jasaqtalyp jatyr», - dedi Beıbit Atamqulov.