Sý tasyǵan óńirlerde eki aılyq dári-dármek qory jasalady – Tamara Dúısenova
ASTANA. KAZINFORM - QR Premer-Mınıstri Oljas Bektenovtiń tóraǵalyǵymen sý tasqyny saldaryn joıý sharalary boıynsha keńes ótti. Premer-Mınıstrdiń orynbasary Tamara Dúısenova medıtsınalyq ónimder men dári-dármek qory týraly baıandady.
Densaýlyq saqtaý boıynsha úsh negizgi mindet aıasynda jumys jasalyp jatyr: sanıtarlyq-epıdemıologııalyq brıgadalar jumysy, zardap shekkenderge medıtsınalyq kómek kórsetý jáne olardy dári-dármekpen qamtamasyz etý.
Atap aıtqanda, sanıtarlyq-epıdemıologııalyq brıgadalar Aýyl sharýashylyǵy mınıstrligi mamandarymen birlese sý sapasyn tekserý jáne ólekse kómilgen jerler, qoqys oryndary jáne septıkterdi baqylaýǵa alý boıynsha jumys júrgizip jatyr.
Budan bólek, jumys toby ınfektsııalyq jáne bakterıologııalyq aýrýlardyń taralýynyń aldyn alý úshin reseılik áriptesterimen únemi baılanysta.
Jumys qorytyndysy boıynsha eskertý sharalary qoldanylady.
Vıtse-premerdiń aıtýynsha, barlyq juqpaly aýrý aýrýhanalary men medqyzmetkerler qajet bolǵan jaǵdaıda táýlik boıy jumys isteýge daıyndalyp otyr.
«Algorıtm bar, evakýatsııalyq pýnkterde mobıldi toptar jumys istep jatyr. Dıspanserlik esepte turǵandar men júkti áıelder erekshe baqylaýda. Dezınfektsııalyq quraldar men dári-dármektiń 2 aılyq qoryn jasaý mindeti tur», — dedi Tamara Dúısenova.
Qajetti dári-dármek qoryn medıtsınalyq uıymdardyń bazalarynda jáne SQ «Farmatsııa» aımaqtyq qoımalarynda jınaý josparlanǵan.
Qazir Densaýlyq saqtaý mınıstrligi óńirlermen tyǵyz baılanysta belsendi jumys jasap jatyr.