Sý tasyǵan óńirlerde 30 myń otbasy birjolǵy tólem aldy
ASTANA. KAZINFORM — Óńirlerde 12 myńnan astam baspanany sý basty. Bul týraly Premer-Mınıstrdiń orynbasary Qanat Bozymbaev málim etti.
«28 mamyrdaǵy málimetke súıensek, respýblıka boıynsha 30 538 otbasy 100 aılyq eseptik kórsetkish mólsherinde birjolǵy tólem alǵan. Bul baǵytta jumys baqylaýda jáne qajetti sharalar qabyldanyp jatyr. Negizgi jumys — turǵyn úılerdi qalpyna keltirý. Sondyqtan óńir ákimderi bul máseleni erekshe baqylaýǵa alýy kerek. Kúndelikti halyqpen jumys júrgizip, týyndaǵan árbir másele boıynsha túsinikteme berýi tıis», — dedi Qanat Bozymbaev Úkimet otyrysynda.
Onyń aıtýynsha, qazir zalaldy óteý algorıtmine sáıkes óńirlerde josparlanǵan sharalar iske asyp jatyr.
«Respýblıka boıynsha sý tasqyny saldarynan shamamen 12 155 úı, sondaı-aq 18 321 saıajaı ýchaskesi zardap shekti, onyń ishinde 5 353 saıajaı úıi bar. 28 mamyrdaǵy málimetke sáıkes, respýblıka boıynsha 15 093 úı tehnıkalyq tekserýden ótkizildi, bul — zardap shekken úılerdiń 84 paıyzy. Sonymen qatar 11 134 úı (64%) baǵalaýdan ótti», — deıdi ol.
