Sý tapshylyǵyna jolyqqan fermerlerge Úkimet rezervinen qosymsha kómek bólemiz – Serikqalı Brekeshev
NUR-SULTAN. QazAqparat – Úkimet otyrysynda QR Ekologııa, geologııa jáne tabıǵı resrýstar mınıstri Serikqalı Brekeshev sý tapshylyǵyna jolyqqan fermerlerge qandaı kómek qarastyrylǵanyn aıtty, dep habarlaıdy QazAqparat tilshisi.
«Shardara sý qoımasyna barynsha eń joǵary aǵyndy qamtamasyz etý boıynsha sharalar qabyldanýda. Onyń basty maqsaty – Túrkistan oblysynyń Shardara, Otyrar jáne Arys aýdandaryndaǵy Qyzylqum alqabyn, sondaı-aq Qyzylorda oblysynyń fermerlerin sýmen qamtamasyz etý.
Ózbek jáne tájik taraptarymen júrgizilgen jumystyń nátıjesinde Shardara sý qoımasyna quıatyn aǵyn sý kólemi ulǵaıtyldy. Naqty aıtsaq, aqpan aıyndaǵy kórsetkish qańtarmen salystyrǵanda 22% paıyz artty. Sondaı-aq, aqpan aıynda «Bahrı Tochık» sý qoımasynan Qazaqstan jaqqa qosymsha 181 mln tekshe metr sý aǵyzyldy.
Kelesi aıda Sý sharýashylyǵyn memleketaralyq úılestirý komıssııasynyń otyrysy ótedi. Onda Naryn-Syrdarııa sý qoımalary kaskadynyń jumys rejımderi kelisiletin bolady. Sonymen qatar, árbir eldiń sý alý lımıtteri bekitiledi», - dedi Serikqalı Brekeshev.
Onyń málimeti boınysha, «Qazsýshar» mekemesi men fermerlerdiń ózderi kanaldardy tazartý boıynsha aýqymdy jumys júrgizip jatqanyn aıtty.
«Sý tapshylyǵy jaǵdaıynda fermerlerge kómek kórsetý úshin Úkimet rezervinen kanaldardy tazalaýǵa, qosymsha sorǵylar satyp alýǵa jáne uńǵymalar burǵylaý jumystaryna tıisti qarajat bólinedi», - dedi mınıstr.
