Sý tapshylyǵynyń aldyn alý úshin 1840 shaqyrym kanal tazalandy
ASTANA. KAZINFORM — Elde sýarý maýsymyna daıyndyq aıasynda 1840 shaqyrym sýarý kanaly tazartylyp, 375 sý sharýashylyǵy nysany jóndeldi.
Bul týraly QR Sý resýrstary jáne ırrıgatsııa mınıstrligi Sý resýrstaryn retteý, qorǵaý jáne paıdalaný komıtetiniń tóraǵasy Seıilbek Nurymbetov málimdedi.
Onyń aıtýynsha, sýarý maýsymy bastalǵanǵa deıin barlyq daıyndyq jumystary aıaqtalǵan.
— Sý tapshylyǵy qaýpin azaıtý úshin sýarý maýsymy aldyndaǵy kezeńde «Qazsýshar» fılıaldary 1840 shaqyrym sýarý kanalyn arnaıy tehnıkamen tazalady. Bul ótken jylǵy kórsetkishten joǵary. Byltyr 1147 shaqyrym kanal tazalanǵan bolatyn. Sonymen qatar 680 shaqyrym sýarý jelisi jóndelip, 375 sý sharýashylyǵy nysany qalpyna keltirildi, — dedi ol.
Komıtet tóraǵasynyń sózinshe, bıyl taǵy 394 sý nysanyn jóndeý jáne 2200 shaqyrymnan astam kanaldy tazalaý josparlanyp otyr. Qazirdiń ózinde 968 shaqyrym kanal tazartylǵan.
Sondaı-aq ol dıqandardy sýmen turaqty qamtamasyz etý úshin sý aıdaıtyn sorǵylar daıyndalǵanyn aıtty.
Buǵan deıin Premer-mınıstr Oljas Bektenov fermerlerdiń sý tapshylyǵyna qatysty máselelerin sheshý jumystary turaqty júrgizilýi tıis ekenin aıtqan edi.
