Sý tapshylyǵynan bolatyn shyǵyn Ortalyq Azııa ekonomıkasynyń 11%-na deıin jetýi yqtımal - sarapshy
TAShKENT. KAZINFORM – Tashkentte ornalasqan Ortalyq Azııa halyqaralyq ınstıtýtynda beldi sarapshylar óńirdegi sý tapshylyǵy máselesin sheshýge baǵyttalǵan is-qımyldardy úılestirý múmkindigin talqylady, dep habarlaıdy Kazinform agenttiginiń Tashkenttegi menshikti tilshisi.
Іs-shara 22 sáýirde Astanada uıymdastyrylatyn Halyqaralyq Araldy qutqarý qorynyń sammıtine oraılastyrylǵan. Dóńgelek ústelde alǵash bolyp sóz alǵan ınstıtýt dırektory Javlon Vahabov óńirdegi sý tapshylyǵy aldaǵy jyldary ekonomıkanyń damýyn tejeıtin negizgi faktorǵa aınalatynyn atap ótti.
— Ortalyq Azııadaǵy sý tapshylyǵynyń keleshekte odan ári kúrdelene túsetinin barlyq tarap jaqsy túsinip otyr. Sarapshylardyń pikirinshe, 2040 jylǵa qaraı óńirdegi keıbir elderde sý resýrstaryna degen qajettilik 3 esege deıin artýy múmkin. Ýaqyt óte kele ekonomıkalyq shyǵyndar aımaqtyń ishki jalpy óniminiń 11%-na deıin jetýi yqtımal, - dep málim etti Javlon Vahabov.
Onyń sózinshe, qazirgi syn-qaterler men táýekelder elderdi biriktiretin mańyzdy quralǵa aınalýy tıis. Sáıkesinshe, Halyqaralyq Araldy qutqarý qory sheńberinde kúsh jumyldyrý mańyzdy.
— Ortalyq Azııa elderi áli de Halyqaralyq Araldy qutqarý qorynyń biryńǵaı óńirlik alań retindegi rólin álsiretetin jáne onyń úılestirýshi organ retindegi áleýetin shekteıtin birqatar kedergilerge tap bolyp otyr. Negizgi táýekelderdiń biri - sý sharýashylyǵy men energetıka salasy arasyndaǵy ózara baılanystyń kúsheıýi, klımattyń tez ózgerýi jáne onyń sý resýrstaryna áseri. Ásirese, tirshilik nárine energetıka men aýyl sharýashylyǵy sekorlary aıtarlyqtaı táýeldi. Osy jáne basqa da ózekti faktorlarmen qatar, Aýǵanstandaǵy ahýal da mańyzdy ról atqarady. Atalǵan el sýdy paıdalanýǵa tolyq quqyly jáne bul resýrsty áleýmettik-ekonomıkalyq damýdyń ómirlik mańyzdy elementi retinde qarastyrady, - dep toqtaldy Ortalyq Azııa halyqaralyq ınstıtýtynyń dırektory J.Vahabov.
Eske salaıyq, qazirgi ýaqytta Qazaqstan men Ózbekstan sý resýrstaryn ǵaryshtan baqylaý júıesin engizýdi talqylap jatyr.
Sonymen qatar, taıaýda Kazinform agenttigine suhbat bergen ózbekstandyq sarapshy Ilhom Begmatov aımaqtaǵy sý tapshylyǵyn sheshý úshin OA elderi ortaq múddege jumylýy qajet ekenin aıtty.
Jaqynda Tashkentte ótken Water week forýmynda sóz sóılegen Sý resýrstary jáne ırrıgatsııa mınıstri Nurjan Nurjigitov Qazaqstan sý sharýashylyǵy salasyndaǵy ulttyq saıasatty únemi jetildirip jatqanyna toqtaldy.
Sondaı-aq ol Qazaqstan men Ózbekstan Syrdarııa ózenine sýdy esepke alatyn qurylǵylardy ornatyp jatqanyn málim etti.
Munymen birge mınıstr bıyl sáýirde elordada ótetin Óńirlik ekologııalyq sammıtinde Astana deklaratsııasy qabyldanatynyn aıtty.
