Sý tapshylyǵy jaǵdaıynda Shardara qoımasyndaǵy artyq sý qalaı bólinedi
ASTANA. KAZINFORM – QR Sý resýrstary jáne ırrıgatsııa birinshi vıtse-mınıstri Nurlan Aldamjarov QR Prezıdenti janyndaǵy Ortalyq kommýnıkatsııalar qyzmetinde ótken baspasóz konferentsııasynda jýrnalısterdiń suraqtaryna jaýap berip, Syrdarııa ózeni men Shardara qoımasyna qatysty sý bólý tártibin túsindirdi.
Jıyn barysynda vıtse-mınıstrge: «Nelikten Qazaqstan 1,8 mlrd tekshe metr sýdy Ózbekstan aýmaǵyndaǵy Myrzashólge aǵyzyp jatyr? Bul elimizdiń sý tapshylyǵyn kúsheıtpeı me? Muny sabotaj nemese ekonomıkaǵa qastandyq deýge bola ma?» degen suraq qoıyldy. Osyǵan baılanysty Nurlan Aldamjarov kelesideı túsinikteme berdi.
– Syrdarııa ózenindegi sý aǵyny, negizinen, qazan aıynan bastap mamyr aıyna deıingi kezeńde qalyptasady. Bul ýaqytta Shardara qoımasyna keletin sýdyń úlesi artady. Jalpy, atalǵan qoımaǵa keletin sýdyń jyldyq kólemi – shamamen 12 mlrd tekshe metr. Al Túrkistan men Qyzylorda oblystaryn tolyq qamtamasyz etý úshin 15 mlrd tekshe metr sý qajet, - dedi vıtse-mınıstr.
Onyń aıtýynsha, bul qajettilikti óteý úshin jyl basynda Qazaqstan men Ózbekstan arasynda resmı sý bólý jónindegi kelisim jasalady.
– Sol kelisim negizinde Shardaraǵa 12 mlrd tekshe metrden artyq sý kelgen jaǵdaıda, artyq sý eki memleket arasynda teń bólinedi. Bıyl qazannan sáýirge deıingi kezeńde Shardaraǵa 12 mlrd 760 mln tekshe metr sý keldi. Qazirgi ýaqytta bul kórsetkish 14,9 mlrd tekshe metrge jetti, - dedi ol.
Sondaı-aq Nurlan Aldamjarov atalǵan kelisim aıasynda kúrdeli vegetatsııalyq kezeńge qaramastan, Qyzylorda jáne Túrkistan oblystary sýmen qamtamasyz etilgenin atap ótti.
Buǵan deıin Sýarmaly alqaptarda sý únemdeý talaptary oryndalmaı jatqan óńirler bar ekenin jazǵan edik.