Sý tapshylyǵy: Qazaqstanda eki iri joba júzege asady
Ortalyq Azııa aımaqtyq ekologııa ortalyǵy turaqty sý paıdalaný salasynda eki iri jobany júzege asyrmaq. Áleýmettik mańyzy bar jobalardyń quny 600 myń dollardan asady, dep habarlaıdy QazAqparat tilshisi.
Ortalyq Azııa aımaqtyq ekologııalyq ortalyqtyń Qazaqstadaǵy dırektory Nuraı Sáttimovtyń aıtýynsha, ilki joba Qazaqstan, Qyrǵyzstan jáne Tájikstandy qamtıdy.
Birinshiden, joba aýyl sharýashylyq daqyldardyń ónimdiligine nuqsan keltirmeı, sýarýdyń jańa ádisteri men tehnologııalaryn engizý arqyly sý tapshylyǵy máselesin sheshýge kómektesedi.
Ekinshiden, Qazaqstan, Qyrǵyzstan jáne Tájikstanda áıelder basqaratyn fermalar men aýyl sharýashylyǵy kásiporyndary sýarmaly sý tapshylyǵyna táýeldiligin tómendetip, ónimdilikti arttyryp, jalpy óńirdegi aýyl sharýashylyǵynyń turaqtylyǵyn jaqsartady.
«Qazaqstandaǵy Esil ózeni basseınindegi sý alaby biriktirilgen basqarý» jobasy Aqmola jáne Soltústik Qazaqstan oblystaryndaǵy Esil ózen basseındegi aýyl sharýashylyq pen jaıylymdyq jerlerdiń jaǵdaıyn jaqsartady. Osy oblystarda turatyn 12 000-nan astam adam aýyl sharýashylyǵynda sý resýrstaryn basqarýdyń keshendi tásilin engizýden tikeleı paıdasyn kóredi. Sonymen qatar, Esil ózeni basseıniniń sý resýrstaryn saqtaý jáne ornyqty paıdalaný jónindegi transshekaralyq dıagnostıkalyq taldaý jáne strategııalyq is-áreket jospary ázirlenetin bolady», — deıdi Nuraı Sáttimov.
Spıkerdiń sózinshe, jobalardyń jalpy quny 600 myń dollardan asady.
Ortalyq Azııa elderindegi tikeleı benefıtsıar sany 22 myńnan, al janama alýshylar sany 200 myńnan asady dep kútilip otyr.
Buǵan deıin Prezıdent Qasym-Jomart Toqaev Araldy qutqarý qorynyń quryltaıshy memleketteri basshylary keńesi otyrysynda, sý saıasatyn qalyptastyrý kezinde onyń shekteýli tabıǵı resýrs ekeni eskerý kerektigin aıtqan bolatyn.
