Sý tapshylyǵy: Bıyl Túrkistan oblysynda kúrish tek Shardarada egiledi

TÚRKІSTAN. KAZINFORM – Transshekaralyq ózenderdegi sý kóleminiń azaıýy Túrkistan oblysyndaǵy kúrish egýge áser etti.

Bıyl Túrkistan oblysynda aýyl sharýashylyǵy daqyldarynyń egis kólemi ótken jylmen salystyrǵanda 13 myń gektarǵa artyp, jalpy 919 myń gektarǵa jetpek.

Oblystyq aýyl sharýashylyǵy basqarmasynyń basshysy Faızýlla Baıdýllaevtyń aıtýynsha, bıyl egis qurylymyn qalyptastyrý barysynda rentabeldiligi joǵary ári qurǵaqshylyqqa tózimdi daqyldarǵa basymdyq berilip otyr.

Atap aıtqanda, maqta egisi 18 myń gektarǵa ulǵaıyp, 162 myń gektar, júgeri 16 myń gektarǵa artyp, 55,2 myń gektar, maqsary 14 myń gektarǵa kóbeıip, 85,5 myń gektar boldy. Al bıdaı alqaby 24 myń gektarǵa qysqartylyp, 216,3 myń gektarǵa egilmek. Máselen, ótken jyly óńirde kúrish egý jospary 3,3 eseden asyp ketken.

– Ónim kólemin eki esege arttyrý jónindegi jol kartasy aıasynda oblysta kúrish daqylyn 3,5 myń gektarǵa ornalastyrý josparlanǵan. Ótken jyly transshekaralyq ózenderdegi sý tapshylyǵy týyndaýyna baılanysty, bıyl kúrish tek Shardara aýdanynda ǵana egiledi, – dedi ol.

Sondaı-aq júgeri daqylynyń egis kólemin arttyrý maqsatynda memlekettik qoldaý tetikteri kúsheıtildi. «Basym daqyldardyń óndirisin damytýdy sýbsıdııalaý» baǵdarlamasy aıasynda júgerini sýbsıdııalaý normatıvi tonnasyna 10 myń teńgeden 30 myń teńgege deıin ulǵaıtyldy. Sondaı-aq maqsary daqylyna beriletin sýbsıdııa kólemi 10 myń teńgeden 25 myń teńgege deıin artty.

Qazir jer jyrtý jumystary 49 paıyzǵa, al sor shaıý jumystary 2 paıyzǵa oryndaldy. Agrotehnıkalyq talaptarǵa sáıkes, jer jyrtý jumystary naýryz aıynda, al sor shaıý 20 aqpanǵa deıin aıaqtalýy tıis.

– 2026 jylǵy dala jumystaryna arnalǵan jeńildetilgen janar-jaǵarmaı boıynsha ótinim 1-30 jeltoqsan aralyǵynda qabyldanyp, jalpy qajettilik 106,3 myń tonna dep anyqtaldy. Bosatý jumystary aqpan aıynan bastalady. Mıneraldyq tyńaıtqyshtarmen qamtamasyz etý úshin oblystyq bıýdjetten 9,5 mlrd teńge qarjy qarastyrylyp, 134 myń tonna tyńaıtqysh engizý josparlanǵan. Sonymen qatar Aýyl sharýashylyǵy mınıstrliginiń jol kartasyna sáıkes, jyl sońyna deıin oblysta 203,5 myń tonna mıneraldy tyńaıtqysh engiziledi. Búgingi tańda qoımalarda 25 myń tonna tyńaıtqysh qory bar, – dep málimdedi vedomstvo.

Dala jumystaryna oblys boıynsha 25,4 myń aýyl sharýashylyǵy tehnıkasy jumyldyrylady. Onyń ishinde 15 myń traktor, 2 myń kombaın jáne 9 myń agregat bar. Tehnıkalardyń 98 paıyzy kóktemgi jumystarǵa daıyn. Bıyl tehnıka parkin jańartý maqsatynda 2 myńnan asa tehnıka satyp alý josparlanyp, bul baǵytqa 16 mlrd teńge qarjy bólindi.

Sonymen qatar aýyl sharýashylyǵy salasyn qarjylandyrý baǵytynda ótken jyly 2 333 jobaǵa 26,4 mlrd teńge bólinse, bıyl bul kórsetkishti 34,7 mlrd teńgege deıin arttyrý kózdelip otyr. Qazirgi tańda 180 joba boıynsha 3,8 mlrd teńgege ótinim qabyldanyp, 101 joba 1,8 mlrd teńgege qarjylandyryldy.

Budan buryn Túrkistan oblysynda aǵynsý tapshylyǵy máselesi qalaı sheshilip jatqanyn jazǵan edik.