Sý tapshylyǵy, arzan nesıe, aýyl ınfraqurylymy: agrosektorda ne ózgeredi
ASTANA. KAZINFORM — Astanada Quryltaıdyń Agrarlyq máseleler, ekologııa jáne tabıǵı resýrstar komıtetiniń keńeıtilgen otyrysy ótti. Jıynda Memleket basshysynyń «Jańa tarıhı kezeńdegi Qazaqstannyń ózekti mindetteri» atty Joldaýynda agrosektor, sý resýrstary jáne ekologııa salalary boıynsha júktelgen mindetterdi júzege asyrý joldary talqylandy.
Otyrysqa Quryltaı Tóraǵasynyń orynbasary Danııa Espaeva, depýtattar men tıisti mınıstrlikterdiń ókilderi qatysty.
Agrosektor: fermerlerge qarjy jáne jańa tehnologııalar
Quryltaı Tóraǵasynyń orynbasary Danııa Espaeva aýyl sharýashylyǵy ónimderin tereń óńdeý, saqtaý jáne ótkizý júıesin jetildirý qajettigin atap ótti. Sondaı-aq fermerlerdiń agrologıstıkalyq ortalyqtarǵa qoljetimdiligin arttyrý, aýyldyq ınfraqurylymdy damytý jáne agroónerkásip keshenine jasandy ıntellekt engizý máselelerine toqtaldy.
Aýyl sharýashylyǵy vıtse-mınıstri Azat Sultanovtyń aıtýynsha, salanyń ónimdiligi men tehnologııalyq deńgeıin arttyrý úshin fermerlerge uzaq merzimdi jeńildetilgen qarjylandyrý usynylady.
Bul baǵytta bıýdjettik jáne kommertsııalyq qarajatty biriktirý tetigi qoldanylady. «Báıterek» holdıngi mal sharýashylyǵyn, aýyl sharýashylyǵy ónimderin saqtaý men qaıta óńdeýdi qarjylandyrýdy jalǵastyrady. Al «QazAgroQarjy» arqyly otandyq traktorlar men kombaındardy satyp alýǵa arnalǵan jeńildetilgen lızıng baǵdarlamasy iske asyrylady.
Sý resýrstary: tarıf pen baqylaý júıesi ózgeredi
Otyrys barysynda sý tapshylyǵy jáne resýrstardy tıimdi paıdalaný máselesine erekshe nazar aýdaryldy.
Danııa Espaeva Memleket basshysy sýdy tutynýdy baqylaýdy kúsheıtý, sý jelilerindegi shyǵyndy azaıtý, tarıftik reformany aıaqtaý jáne sý resýrstarynyń ulttyq aqparattyq júıesin qurý mindetterin qoıǵanyn aıtty.
Sý resýrstary jáne ırrıgatsııa vıtse-mınıstri Jandos Sálimov saladaǵy negizgi baǵyttardy atady. Olar:
-
sý sharýashylyǵy ınfraqurylymyn jańǵyrtý;
-
sý únemdeý tehnologııalaryn engizý;
-
tarıftik saıasatty jetildirý;
-
sý resýrstaryn basqarýdy tsıfrlandyrý;
-
halyqaralyq qarjylandyrý tartý;
-
sý salasyndaǵy zańnama men memlekettik baqylaýdy jetildirý.
Vıtse-mınıstrdiń aıtýynsha, jańa Sý kodeksiniń talaptaryn iske asyrý jáne sý resýrstarynyń ulttyq aqparattyq júıesin tolyqqandy iske qosý mańyzdy. Bul halyq pen ekonomıkany sýmen qamtamasyz etýge jáne strategııalyq sý nysandaryn saqtaýǵa baǵyttalǵan.
Ekologııa: shyǵaryndylardy baqylaý jáne «Taza Qazaqstan»
Ekologııa jáne tabıǵı resýrstar vıtse-mınıstri Nurken Shárbıev 2029 jylǵa qaraı turaqty energııa profıtsıtin qamtamasyz etý mindeti qoıylǵanyn jetkizdi.
Osy maqsatta elektr stantsııalary men jelilerin salý jáne jańǵyrtý, taza kómir tehnologııalaryn jáne jańartylatyn energııa kózderin, ásirese kún energetıkasyn damytý josparlanǵan. Kómir stantsııalaryn paıdalaný kezinde tazartý tehnologııalary men zııandy shyǵaryndylardy baqylaýǵa basymdyq beriledi.
Sonymen qatar «Taza Qazaqstan» aktsııasy aıasynda qalalar men aýyldarda tazalyqty saqtaý, qoqysty ýaqytyly shyǵarý, konteınerlik alańdardy retke keltirý jáne zańsyz qoqys oryndaryn joıý jumystary jalǵasady.
Usynystar Úkimetke joldanady
Otyrys barysynda Quryltaı depýtattary mınıstrlik ókilderine agrosektor, sý resýrstary jáne ekologııa salalaryndaǵy ózekti máseleler boıynsha suraqtar qoıdy.
Jıyndy qorytyndylaǵan komıtet tóraǵasy Serik Egizbaev qatysýshylardyń usynystary Úkimetke joldanatynyn aıtty.
Quryltaıdyń baspasóz qyzmetiniń málimetinshe, depýtattar Prezıdent Joldaýynda belgilengen mindetterdiń tıimdi ári ýaqytyly oryndalýyna atsalysady.
Buǵan deıin salyq zańnamasyna ózgerister Quryltaı qaraýyna qashan engiziletinin jazǵanbyz.
