Sý sporty túrlerinen ACh: Qazaqstan qorjyny taǵy tórt medalmen tolyqty
NUR-SULTAN. QazAqparat – Úndistannyń Bengalýrý qalasynda sý sporty túrlerinen ótip jatqan jasóspirimder arasyndaǵy Azııa chempıonatynda qazaqstandyq sportshylar taǵy tórt medal jeńip aldy, dep habarlaıdy QazAqparat tilshisi.
QR Ulttyq olımpıadalyq komıteti habarlaǵandaı, jarystyń ekinshi kúninde qazaqstandyqtar tórt medal jeńip aldy.
Atap aıtsaq, keshendi estafetada Kırıll Lıýbımov, Arsen Qojahmetov, Rýslan Sınıtsyn jáne Mıhaıl Tsarev kúmis júldeger atandy.
Al 50 metrge brass ádisimen júzýde Sofııa Ábýbákirova ekinshi oryn alsa, erler arasynda Arsen Qojahmetov qola júldege qol jetkizdi. Krol ádisimen 50 metrge júzýde Mıhaıl Tsarev qola medal aldy.
Esterińizge sala keteıik, osyǵan deıin, ıaǵnı jarystyń alǵashqy kúninde qazaqstandyqtar úsh qola medal jeńip alǵany týraly habarlaǵan edik.
Sondaı-aq, jarys barysynda tehnıkalyq aqaýǵa baılanysty úzilip qalǵan Ánuranymyzdy jas qyzdarymyz ary qaraı ózderi aıtyp, jankúıerlerdiń ystyq yqylasyna bólengenin de atap ótken bolatynbyz.
