Sý, shokolad, qalam: UBT-ǵa ne alyp kirýge bolady

ASTANA. QazAqparat - Ulttyq testileý ortalyǵynyń dırektory Rýslan Emelbaev ulttyq biryńǵaı testileýge kirý talaptaryn taǵy bir ret túsindirdi, dep habarlaıdy QazAqparat.

«Áli kúnge deıin UBT tapsyrýshylardan «ózimmen birge kalkýlıatordy ala kelsem bola ma?» degen suraq kelip jatyr. Sondyqtan bul týraly UBT aldynda taǵy bir márte esterińizge sala keteıin. Testileýge jeke kýálik, qalam, sý jáne shokoladtan basqa eshnárse alyp kirýge bolmaıdy», -dep jazdy ortalyq dırektory áleýmettik jelide.

Onyń aıtýynsha, testileý kompıýterinde matematıka, matematıkalyq saýat, fızıka, hımııa, ınformatıka, geografııa, bıologııa pánderi boıynsha elektrondy kalkýlıator bar.

Sondaı-aq, kompıýter ekranyna Mendeleev jáne tuzdar erigishtigi kesteleri, Beketov qatary ornatylǵan.

«Al túlekterdiń qalaýy boıynsha Mendeleev jáne tuzdar erigishtigi kesteleriniń qaǵaz nusqasyn ózimiz shyǵaryp, qoldanýǵa beremiz. Onyń bári sizderge yńǵaıly bolýy úshin, alaıda akademııalyq adaldyq týraly da umytpaǵan jón»,-deıdi Rýslan Emelbaev.

Eske sala keteıik, keshe Qazaqstanda negizgi UBT bastaldy. Ol 5 shildege deıin jalǵasady.