Sý shyǵynyn azaıtý úshin Qazaqstanda 746 kanal jańartylady
ASTANA. KAZINFORM — Sý resýrstary jáne ırrıgatsııa mınıstrligi jalpy uzyndyǵy 4,6 myń shaqyrymnan asatyn 746 kanaldy rekonstrýktsııalaý jumystaryn júrgizip jatyr.
Bıyl 964 shaqyrym kanaldy jóndeý jumystaryn aıaqtaý josparlanǵan. Bul shamamen 200 myń gektar sýarmaly jerdiń sýmen qamtamasyz etilýin jaqsartýǵa múmkindik beredi.
Irrıgatsııa jelilerin rekonstrýktsııalaý jáne jańǵyrtý jumystary sýdy tasymaldaý kezindegi shyǵyndy azaıtýǵa baǵyttalǵan. Sonymen qatar birqatar joba aıasynda avtomattandyrý elementterin engizý kózdelgen. Bul sý resýrstarynyń naqty esebin júrgizýge múmkindik beredi.
Irrıgatsııa jelilerin jańǵyrtýmen qatar, 12 gıdrotehnıkalyq qurylysty rekonstrýktsııalaý, jalpy syıymdylyǵy 887 mıllıon tekshe metr bolatyn bes sý qoımasyn salý jumystary júrgizilip jatyr. Sondaı-aq 142 eldi mekendi sapaly aýyz sýmen qamtamasyz etý maqsatynda 12 aýyz sýmen jabdyqtaý nysanynyń qurylysy qolǵa alynǵan.
— Memleket basshysy Qazaqstan halqyna Joldaýynda aýyl sharýashylyǵynda sýdy barynsha tıimdi paıdalaný qajettigine erekshe nazar aýdardy. Sý sharýashylyǵy ınfraqurylymyn damytý sý resýrstaryn únemdeýge yqpal etedi. Bul, ásirese, aýyl sharýashylyǵy taýaryn óndirýshilerdiń basym bóligi shoǵyrlanǵan ońtústik óńirler úshin mańyzdy. Rekonstrýktsııalanyp jatqan nysandarda sýdyń esebin naqty júrgizý maqsatynda avtomattandyrý elementteri engizilip jatyr, — dedi Sý resýrstary jáne ırrıgatsııa vıtse-mınıstri Jandos Sálimov.
Osyǵan deıin Sátbaev atyndaǵy kanaldyń apattyq jaǵdaıda turǵan bógeti nyǵaıtylyp jatqanyn jazǵanbyz.
