Sý shaıǵan joldardyń kópshiligi 1960-70 jyldary paıdalanýǵa berilgen – QazAvtoJol
ASTANA. KAZINFORM – Sý tasqynynan keıin jol mamandaryn úlken jumys kútip tur. Qazir «QazAvtoJol» kompanııasy barlyq zalaldy esepteýde. Bul týraly «Jibek Joly» telearnasynda ótken «Biz birgemiz» telemarafonynda aıtyldy.
«QazAvtoJol» AQ basqarma tóraǵasy Darhan Imanashevtiń aıtýynsha, sý tasqyny bastalǵaly 12 oblysta joldardy sý shaıǵan 168 jaǵdaı tirkeldi.
«Qazirgi ýaqytta Atyraý, Aqtóbe, Soltústik Qazaqstan oblystarynda 6 avtojolda shekteý bar. Barlyq merdiger uıymdar daıyn, materıal ázirleý jumystary tolyqqandy júrýde. Barlyq qajetti tehnıka daıyn tur. Sý deńgeıiniń tómendegenin ǵana kútip otyrmyz, sodan keıin birden iske kirisemiz. Bul jumystar qurylys maýsymynyń sońyna deıin aıaqtalady», — dedi D.Imanashev telemarafonda.
Sonymen birge, atalǵan kompanııa óńirlerde sý tasqyny saldaryn joıýǵa tikeleı atsalysyp keledi. Ol úshin 700 tehnıka jumyldyrylyp, ınertti materıaldar berilýde.
«Kompanııa bolǵan jaǵdaıdan tıisti qorytyndy shyǵardy. Degenmen, sý shaıǵan joldardyń 95 paıyzy ótken ǵasyrdyń 60-70 jyldary paıdalanýǵa berilgen jol bólikterinde boldy. Osyǵan qaramastan, bıylǵy jóndeý jáne qurylys jumystarynda barlyq kemshilikter qaıta qaralyp, túzetiledi», — dedi spıker.
Aıta keteıik, sý tasqynyndaǵy el birligine arnalǵan «Biz birgemiz» telemarafony «Jibek Joly» arnasynda jalǵasýda. 5 saǵattyq tikeleı efırde tasqyn basqan aýmaqty kózben kórgen, tabıǵı apattan zardap shekken turǵyndardyń jan tebirenter oqıǵalary aıtylyp, tabıǵı apat aımaqtarynan reportajdar beriledi.
