Sý sharýashylyǵy salasyna qajetti mamandar qazir suranystan 2 ese az daıyndalýda
ALMATY. 15 shilde. QazAqparat - Qazaqstanǵa jyl saıyn sý sharýashylyǵy salasynda oqý oryndarynda 400 maman daıyndaýymyz qajet. Bul týraly QR Sý sharýashylyqtary qaýymdastyǵynyń tóraǵasy Nurlan Atshabarov QazAqparat tilshisine bergen suhbatynda aıtty.
«Elimizdegi ózen sýlarynyń teń jartysy kórshiles shetelderde quralady. Ókinishke oraı, olardyń sýyn tıimdi paıdalaný máselesi áli óz sheshimin tappaı keledi. Buǵan onda sý rettegish jabdyqtardyń bolmaýy túrtki bolýda. Biz qazir óz aýmaǵymyzdaǵy ózenderdi qajetti qural-jabdyqpen jaraqtaı almaǵandyqtan, ózge elderge esh talap qoıa almaı otyrmyz», - deıdi N. Atshabarov. Onyń aıtýynsha, elimizdegi transshekaralyq ózenderde alǵashqy sý toraby ótken ǵasyrdyń 50-60-jyldary Shý ózeninde qazaq-qyrǵyz shekarasynda salynǵan. Odan keıin araǵa 60 jyl salyp, mundaı sý rettegish torap jaqynda Qorǵas ózeninde qazaq-qytaı shekarasynda ashyldy. Aldaǵy ýaqytta bul tájirıbeni barlyq transshekaralyq ózenderde júzege asyrý kerek. Óıtkeni Qazaqstan qazir 2,3 mln. gektar bolatyn sýarmaly jeriniń tek 1,5 mln. gektaryn ǵana ıgerip otyr. Qazirgi tańda sýǵa qatysty máseleniń bári onyń rettelmeýinen týyndap otyr. Sýdy únemdeý úshin aldymen ony ólsheý, retteý qondyrǵylaryn ornatý kerek. Sodan keıin tıimdi paıdalaný týraly sóz qozǵaýǵa bolady. Al ony bilikti mamandarsyz júzege asyrý múmkin emes.
