Sý sharýashylyǵy komıtetiniń býhgalterlik esebin biliktiligi joq qyzmetker júrgizgen - Esep komıteti

ASTANA. QazAqparat - Sý sharýashylyǵy komıtetiniń býhgalterlik esebin biliktiligi joq qyzmetker júrgizgen. Bul jaıynda Respýblıkalyq bıýdjettiń atqarylýyn baqylaý jónindegi esep komıtetiniń sý sharýashylyǵyn damytýǵa bólingen respýblıkalyq bıýdjet qarjysynyń tıimdi paıdalanylýyna baqylaý qorytyndylaryna arnalǵan kezekti otyrysynda belgili boldy.

«Otyrys barysynda QR AShM Sý sharýashylyǵy komıtetinde býhgalterlik eseptiń múldem joq ekendigi atap ótildi. Býhgalter qyzmeti sáıkesinshe biliktiligi joq qyzmetkerge júktelgen. Jalpy somasy 407,6 mln. teńgeni quraıtyn debıtorlyq jáne kredıtorlyq bereshektiń qysqartylý, eseptik aqparattardyń burmalaný, aıaqtalmaǵan qurylys qunynyń jáne negizgi quraldardyń 12 790,0 mln. teńgege tómendetilý faktileri anyqtaldy», - delingen habarlamada.

Vedomstvonyń atap ótýinshe, komıtettiń zańgerlik qyzmetiniń jumysy álsiz uıymdastyrylýy saldarynan jumysty júrdim-bardym istegen merdigerlerge qatysty talap aryzdar der ýaqytynda berilmeı, birneshe márte sotqa kelmeı qalý faktileri oryn alǵan. Nátıjesinde komıtettiń 19 talap aryzy sotta qaralmaı qalǵan.