Sý sharýashylyǵy salasynda qyzmettik tekseris bastalady — mınıstrlik

ASTANA. KAZINFORM — Sý resýrstary jáne ırrıgatsııa mınıstrligi sýarý maýsymynyń qorytyndysy boıynsha qyzmettik tekseris júrgizedi.

Sý resýrstary jáne ırrıgatsııa mınıstri Nurjan Nurjigitov vegetatsııa kezeńi máselesi boıynsha apparat keńesin ótkizdi. Vedomstvo basshysy sýarý maýsymynyń qorytyndysy boıynsha qyzmettik tekseris júrgizýdi tapsyrdy.

— Vegetatsııa kezeńi aıaqtalýǵa jaqyn. Bıyl ol kúrdeli jaǵdaıda ótip jatyr. Aptap ystyq pen jaýyn-shashynnyń bolmaýy sýdy kóbirek tutynýǵa alyp keldi. Keıbir óńirde tıisti baqylaý júrgizilmeı, ylǵaldy kóp qajet etetin daqyldardyń jospardan tys egilý faktileri tirkeldi. Bul jaǵdaı elimizdiń ońtústigindegi sý sharýashylyǵy ahýalyna aıtarlyqtaı áser etti. Sondyqtan mundaı olqylyqtardyń qaıtalanbaýy úshin vegetatsııa kezeńi qorytyndysy boıynsha qyzmettik tekseris júrgizýdi tapsyramyn, — dedi Sý resýrstary jáne ırrıgatsııa mınıstri Nurjan Nurjigitov. 

Qazirgi tańda Almaty men Jetisý oblystarynda vegetatsııa kezeńi turaqty ótip jatyr. Almaty oblysynda sý alý kólemi 1,2 mlrd tekshe metrdi qurap, 136 myń gektar egis alqaby sýaryldy. Al Jetisý oblysynda sý alý kólemi 1 mlrd tekshe metrdi qurap, 132 myń gektar jer sýaryldy. Vegetatsııa kezeńiniń sońyna deıin bul eki oblysta qosymsha shamamen 150 myń tekshe metr sý alý josparlanǵan. Bul sharýalardyń qajetin tolyq qamtamasyz etedi.

Qazirgi ýaqytta Almaty jáne Jetisý oblystarynda qant qyzylshasy, soıa, júgeri, kópjyldyq shópter men baqshalardy sýarý jalǵasyp jatyr. Bul óńirlerde sýarý jumystary qyrkúıek aıynyń sońyna deıin aıaqtalady dep kútilip otyr.

Jambyl oblysynda vegetatsııa kezeńi josparǵa sáıkes ótip jatyr. «Qazsýshar» RMK-nyń jergilikti fılıaly 78 925 gektar jerdi sýarý úshin 3 902 kelisimshart jasasqan, onyń 70 000 gektary sýarylǵan. Qalǵan 8 925 gektar qant qyzylshasy, júgeri, kókónister men jońyshqa egilgen jerlerdi sýarý qajet. Shý, Talas ózenderinen jáne Tasótkel sý qoımasynan alynǵan sý kólemi — 897 mln tekshe metr. Oblysta kanaldar arqyly kezekpen sý berý uıymdastyrylǵan. Ol egis alqaptaryn qyrkúıektiń ortasyna deıin sýmen qamtamasyz etýge múmkindik beredi.

Qyzylorda oblysynda sý alý kólemi — 3,476 mlrd tekshe metr. Aımaqta kúrishtiń masaqtaný kezeńi kestege saı ótip jatyr. Egistikterdi qosymsha sýmen qamtamasyz etý úshin oblystaǵy «Qazsýshar» fılıaly men sharýa qojalyqtary 357 sorǵy stantsııasyn paıdalanýda.

Túrkistan oblysynda sý alý kólemi — 3,27 mlrd tekshe metr. Búginde Shardara aýdanynda negizgi daqyldardy sýarý jumystary aıaqtalýǵa jaqyn, sýǵa degen suranys azaıǵan, ónim joǵaltý qaýpi joq. Maqtaaral jáne Jetisaı aýdandarynda 109,7 myń gektar jer sýarylǵan. Aýyl sharýashylyǵy daqyldaryn sýarý jumystary 10 qyrkúıekke deıin tolyq aıaqtalady dep kútilip otyr.

Qosymsha sharalar retinde Qyzylorda jáne Túrkistan oblystarynda kanaldar arqyly kezekpen sý berý kestesi bekitildi, 169 tik drenaj júıesi qosyldy, sý sharýashylyǵy jaǵdaıyna turaqty monıtorıng júrgizilip, kollektorly-drenajdyq sý qaıta paıdalanylyp jatyr. Osy sharalardyń nátıjesinde vegetatsııa kezeńi ónim shyǵynynsyz aıaqtalady dep kútilip otyr.

Buǵan deıin Sý resýrstary mınıstrligi sýdy ortaq paıdalanýdyń erejelerin bekitkenin jazǵanbyz.