Sý sharýashylyǵy mamandyqtaryna beriletin grant 1000-ǵa jetti
ASTANA. KAZINFORM – Jańa oqý jylynda sý salasy mamandyqtary boıynsha 840 stýdent bilim alýdy bastady.
2026-2027 oqý jylynda 840 birinshi kýrs stýdenti joǵary oqý oryndarynda sý salasyna qatysty mamandyqtar boıynsha bilim ala bastady. Osylaısha, Qazaqstan ýnıversıtetterinde sý sharýashylyǵy mamandyqtaryn meńgerip jatqan stýdentterdiń jalpy sany 3 myńnan asty.
Qazirgi ýaqytta orta arnaýly oqý oryndarynda 800-den astam adam oqıdy. Olardyń júzden astamy jańa oqý jyly bastalar aldynda oqýǵa tústi.
Eske sala keteıik, Qazaqstanda Sý resýrstary jáne ırrıgatsııa mınıstrligi qurylǵannan beri sý sharýashylyǵy salasyna mamandar daıarlaıtyn oqý oryndarynyń sany artty. Mysaly, 2023 jyly respýblıkada bolashaq sý sharýashylyǵy mamandaryn daıarlaıtyn 9 joǵary oqý orny men 6 kolledj bolsa, búginde sý sharýashylyǵy salasynyń mamandaryn 13 ýnıversıtet pen 10 orta arnaýly oqý orny daıarlaıdy.
Sondaı-aq sý salasynyń mamandyqtary boıynsha oqýǵa túsetin talapkerlerge arnalǵan bilim berý granttarynyń sany da artty. Atap aıtqanda, 2023-2024 oqý jylyndaǵy 262 granttan 2024-2025 oqý jylynda 390 grantqa deıin, al ótken oqý jylynda 1000 grantqa deıin kóbeıdi.
Sonymen qatar «Qazsýshar» RMK kásiporyndarynda óndiristik tájirıbeden ótetin stýdentter sany da artyp keledi. 2024 jyly tájirıbeden 82 stýdent ótse, 2025 jyly — 470, al bıyl 700-den astam stýdent óndiristik tájirıbeden ótti.
Soltústik Qytaı elektr energetıkasy ýnıversıtetimen, Vengrııadaǵy Korvınýs jáne Obýda ýnıversıtetterimen, sondaı-aq Ózbekstandaǵy Tashkent ırrıgatsııa jáne aýyl sharýashylyǵyn mehanıkalandyrý ınjenerleri ınstıtýtymen qos dıplomdy bilim berý baǵdarlamalary júzege asyrylyp jatyr.
— Qazaqstannyń barlyq oqýshysyn, stýdentteri men pedagogterin Bilim kúnimen quttyqtaımyn. Jańa oqý jylynda tabys tileımin. Búgin alǵan bilim bolashaq kásibı qyzmet úshin mańyzdy negiz bolady. Óz tarapymyzdan mınıstrlik sala qyzmetkerleriniń eńbek jaǵdaılaryn jaqsartý boıynsha qajetti sharalardy qabyldap jatyr. Máselen, eki jyl ishinde «Qazsýshar» RMK-daǵy ortasha jalaqy eki eseden astamǵa artty. Sonymen qatar sheteldik seriktesterdiń qatysýymen qoldanystaǵy mamandardyń biliktiligin arttyrý baǵdarlamalary da iske asyrylyp jatyr, — dedi Sý resýrstary jáne ırrıgatsııa mınıstriniń mindetin atqarýshy Nurjan Nurjigitov.
Aıta ketelik elde stýdentter sany 1 mln-ǵa jýyqtaıdy.
