Sý sharýashylyǵy mamandyqtaryna 751 memlekettik grant bólindi
ASTANA. KAZINFORM — Qazaqstanda sý sharýashylyǵy salasyndaǵy mamandar tapshylyǵyn joıý úshin keshendi jumystar qolǵa alyndy. Sý resýrstary jáne ırrıgatsııa mınıstri Nurjan Nurjigitov ótkizgen apparat keńesinde kadrlyq áleýetti arttyrý máselesi talqylandy.
Máselen, aldaǵy 2026-2027 oqý jylynda sý mamandyqtaryn tańdaıtyn talapkerler úshin memleket tarapynan 751 bilim berý granty bólinbek.
Granttar negizgi tórt baǵyt boıynsha úlestirildi:
Sý resýrstary jáne sýdy paıdalaný – 336 grant (onyń ishinde 50-i qysqartylǵan oqý túrine);
Gıdrotehnıkalyq qurylys jáne sý resýrstaryn basqarý – 215 grant;
Gıdromelıoratsııa – 100 grant;
Sýmen jabdyqtaý jáne sý burý – 100 grant.
Bul tizimge joǵary oqý oryndarynyń ózderi bóletin nysanaly granttar kirmegen, olardyń naqty sany aı sońynda belgili bolady. Búginde elimizde osy salada 2629 stýdent, onyń ishinde bakalavrıatta 2393, magıstratýrada 126 jáne doktorantýrada 110 adam bilim alyp jatyr.
Mınıstr stýdentterdiń «Qazsýshar» mekemesinde sapaly óndiristik tájirıbeden ótýin jáne túlekterdiń 100% jumyspen qamtylýyn qatań tapsyrdy. Ol úshin vedomstvoǵa qarasty Ulttyq gıdrogeologııalyq qyzmet, Ǵylymı-zertteý ınstıtýty sııaqty mekemelerdegi bos jumys oryndary tıimdi paıdalanylmaq. Sondaı-aq aldaǵy 5 jylǵa arnalǵan kadr qajettiligin anyqtaý úshin Ǵylym jáne joǵary bilim mınıstrligimen birlesken jumys josparlanyp otyr.
Buǵan deıin habarlaǵanymyzdaı, doktoranttarǵa grant kóbeıip, jas ǵalymdarǵa qoldaý kúsheıdi.
