Sý salasynyń mamandary shetelde oqyp, qos dıplom ala alady

ASTANA. KAZINFORM — Bıyl sý salasynyń 500-den astam qyzmetkeri mamandandyrylǵan ortalyqtarda biliktilik arttyrý kýrstarynan ótti, dep habarlaıdy Sý resýrstary jáne ırrıgatsııa mınıstrligi.

Bul bastapqy jospardan 12%-ǵa artyq. Sý resýrstary jáne ırrıgatsııa mınıstrligi bıyl sý salasy mamandyqtarynyń tartymdylyǵyn arttyrý úshin birqatar is-sharalardy júzege asyrdy. Máselen, «Bolashaq» baǵdarlamasyna ózgerister engizilip, oǵan sý salasynyń mamandyqtary qosyldy. Nátıjesinde, qazaqstandyq stýdentter atalǵan mamandyqtar boıynsha shetelde bilim alý múmkindigine ıe boldy.

— Sý sharýashylyǵy salasyna jas mamandardy tartý jáne qyzmetkerlerdiń biliktiligin arttyrý — mınıstrlik jumysynyń basym baǵyttarynyń biri. Bıyl 9 joǵary oqý ornymen yntymaqtastyq týraly memorandýmǵa qol qoıdy. Osynyń nátıjesinde, 80 stýdent «Qazsýshar» fılıaldarynda óndiristik tájirıbeden ótti. Budan bólek, sheteldik áriptes ýnıversıtettermen qos dıplomdyq jáne birlesken bilim berý baǵdarlamalaryn damytý jóninde is-sharalar qabyldanady, — dedi QR SRIM Ǵylym jáne ınnovatsııalar departamentiniń dırektory Múslim Jıenbaev.

Aıta keteıik, buǵan deıin «Bolashaq» stıpendııasynan aıyrylǵandardyń sany belgili boldy.