Sý salasyndaǵy áriptestik: Qazaqstan men Izraıl ózara túsinistik týraly kelisimge keldi
ASTANA. KAZINFORM — QR Sý resýrstary jáne ırrıgatsııa mınıstrligi men Izraıl memleketiniń Óńirlik yntymaqtastyq mınıstrligi ózara túsinistik pen yntymaqtastyq týraly memorandýmǵa qol qoıdy. Bul týraly vedomstvonyń baspasóz qyzmeti málim etti.
Qujatqa QR Sý resýrstary jáne ırrıgatsııa mınıstri Nurjan Nurjigitov pen Izraıldiń Óńirlik yntymaqtastyq mınıstri Davıd Amsalem qol qoıdy. Memorandým sý resýrstary salasyndaǵy ekijaqty yntymaqtastyqty nyǵaıtýǵa baǵyttalǵan.
Yntymaqtastyq baǵyttaryna sý sharýashylyǵy ınfraqurylymyn jańǵyrtý, sý resýrstaryn tıimdi paıdalaný, sýdy únemdeý jáne qaıta paıdalaný tehnologııalaryn engizý, sondaı-aq ınnovatsııalar men tehnologııalar salasynda tájirıbe almasý kiredi. Atap aıtqanda, qashyqtan zondtaý arqyly derekterdi jınaý, basqarý jáne óńdeý tehnologııalary baǵyttarynda tájirıbe almasý kózdelgen.
Qujatta sonymen qatar sý resýrstaryn esepke alý men monıtorıng júıesin tsıfrlandyrý boıynsha tájirıbe almasý, sý tasqyny men qurǵaqshylyq qaýpin basqarý salasynda ózara is-qımyl, ǵylymı-tehnıkalyq yntymaqtastyq jáne bilikti mamandardy birlesip daıarlaý qarastyrylǵan.
Memorandýmǵa qol qoıý rásimi aıasynda mınıstrler Izraıldiń jetekshi kompanııalarynyń ókilderimen ekijaqty kezdesý ótkizdi. Taraptar aýyl sharýashylyǵynda sý únemdeý tehnologııalaryn engizý, sondaı-aq qazaqstandyq sý sharýashylyǵy mamandaryn Izraıl kásiporyndarynda oqytý jónindegi birlesken baǵdarlamalardy ázirleý múmkindikterin talqylady.
— Izraıl kúrdeli klımattyq jaǵdaıda sý resýrstaryn basqarý salasynda baı tájirıbege jáne osy saladaǵy ozyq tehnologııalarǵa ıe. Biz Qazaqstannyń sý sharýashylyǵy salasyn barlyq baǵyt boıynsha jańǵyrtýǵa baǵyttalǵan ózara tıimdi jáne uzaq merzimdi áriptestikti damytýǵa múddelimiz. Bul sý resýrstaryn esepke alý men bólý protsesterin tsıfrlandyrýdy, jańa sý únemdeý júıelerin engizýdi, derekterdi jınaýdyń zamanaýı ádisterin qoldanýdy jáne otandyq mamandardyń biliktiligin arttyrýdy qamtıdy, — dedi Sý resýrstary jáne ırrıgatsııa mınıstri Nurjan Nurjigitov.
Buǵan deıin habarlanǵandaı, SQO-nyń 42 aýyly sapaly aýyzsýmen qamtamasyz etiledi.