Sý salasynda ınfraqurylymdyq jobalardy iske asyrý nátıjesinde 975 jumys orny ashylady
ASTANA. KAZINFORM – Sý resýrstary jáne ırrıgatsııa mınıstrligi Sý salasyn damytýdyń keshendi jospary aıasynda Qazaqstannyń barlyq óńirinde gıdrotehnıkalyq qurylystardy salý jáne rekonstrýktsııalaý boıynsha birqatar iri ınfraqurylymdyq jobany júzege asyryp jatqanyn jarııalady.
Jobalardy iske asyrý nátıjesinde 975 turaqty jáne 1866 ýaqytsha jumys orny qurylady. Bul shara sý sharýashylyǵy nysandarynyń qaýipsiz paıdalanylýyn qamtamasyz etýge jáne sý resýrstaryn tıimdi basqarýǵa baǵyttalǵan.
– Jańa jumys oryndarynyń ashylýy óńirlerdegi, ásirese aýyldyq jerlerdegi halyqtyń turmys sapasyn jaqsartýǵa yqpal etedi. Sonymen qatar sý sharýashylyǵy ınfraqurylymyn damytý salaǵa jańa bilikti mamandardy tartýǵa múmkindik beredi. Qazirgi tańda sý mamandyqtary boıynsha shamamen 2,7 myń stýdent bilim alyp jatyr. «Qazsýshar» RMK fılıaldarynda óndiristik tájirıbeden ótetin stýdentterdiń sany da jyl saıyn artyp keledi. Budan bólek, sala qyzmetkerleriniń jalaqysyn kezeń-kezeńimen arttyrý boıynsha jumystar turaqty júrgizilip jatyr, – dedi Sý resýrstary jáne ırrıgatsııa mınıstri Nurjan Nurjigitov.
Eske salsaq, 2024 jyly bekitilgen Sý salasyn damytýdyń keshendi josparyna sáıkes 42 jańa sý qoımasyn salý, qoldanystaǵy 37 sý qoımasyn rekonstrýktsııalaý jáne 14,5 myń shaqyrym kanaldy jańǵyrtý kózdelgen.
Qazirgi ýaqytta úsh jańa sý qoımasynyń qurylysy bastaldy. Túrkistan oblysynda eki sý qoımasynyń qurylysy aıaqtalýǵa jaqyn. Sonymen qatar mınıstrlik taǵy eki sý qoımasyn salýǵa arnalǵan joba qujatyn ázirleýdi aıaqtady. Taǵy 13 nysandy salýǵa qujattar ázirlenip jatyr.
Sondaı-aq mınıstrlik bes sý qoımasyn rekonstrýktsııalaý jumystaryn aıaqtady. Oǵan qosa, segiz sý qoımasyn rekonstrýktsııalaýǵa arnalǵan joba qujaty daıyn. Budan bólek, 18 nysan boıynsha qajetti qujattar ázirlenip jatyr.
2024-2025 jyldary shamamen 1,5 myń shaqyrym kanaldy rekonstrýktsııalaý jáne jańǵyrtý jumystary aıaqtaldy. Al jyl sońyna deıin jalpy uzyndyǵy 962 shaqyrym kanaldy paıdalanýǵa berý josparlanyp otyr. Bul shamamen 200 myń gektar sýarmaly jerdiń sýmen qamtamasyz etilýin jaqsartýǵa múmkindik beredi.
Aıta keteıik, elimizdiń sý sharýashylyǵy salasynda 29 myńnan asa adam eńbek etedi.
